राष्ट्रपती द्रौपदी मुर्मू यांच्या रामतीर्थावरील ध्वजारोहण सोहळ्याच्या बंदोबस्तातून मिळालेल्या अनुभवाच्या आधारे नाशिक पोलिस दलाने एकदिवसीय डी-ब्रीफिंग व विशेष प्रशिक्षण कार्यशाळा घेतली. बुधवारी झालेल्या या कार्यशाळेत दलातील १२९ अधिकारी आणि ६०० अंमलदार सहभागी झाले होते. आगामी सिंहस्थातील गर्दी व्यवस्थापन आणि सुरक्षेच्या तयारीसाठी हा उपक्रम राबवण्यात आला.
ध्वजारोहण सोहळ्यादरम्यान मिळालेले प्रत्यक्ष अनुभव, गर्दीच्या वेळी आलेली निरीक्षणे आणि स्थानिक त्रुटींचे सखोल विश्लेषण करून पोलिस दलाची व्यावसायिक क्षमता, तातडीने निर्णय घेण्याची क्षमता आणि आंतरविभागीय समन्वय सुधारणे हा कार्यशाळेचा मुख्य उद्देश असल्याचे पोलिस आयुक्त संदीप कर्णिक यांनी सांगितले. या वेळी सोहळ्यात सहभागी झालेल्या जिल्हा प्रशासनासह विविध विभागांच्या अधिकाऱ्यांनी पोलिस यंत्रणेच्या कामकाजाचे कौतुक केले.
पासेसच्या वाटपावरून चर्चा
कार्यशाळेत सिंहस्थ प्राधिकरणाकडून प्रमाणापेक्षा अधिक पासेसचे वाटप झाल्याने निर्माण झालेला गोंधळ आणि त्यातून पोलिस यंत्रणेशी झालेल्या बाचाबाचीच्या प्रसंगांवरही चर्चा झाली. पासेस यंत्रणांच्या अधिकाऱ्यांना वेळेत मिळाले नाहीत, तसेच अधिक वाटप झाल्याने ऐनवेळी आसनव्यवस्था अपुरी पडल्याचे निदर्शनास आणून देण्यात आले. सर्वसामान्य नागरिकांना सोहळ्याची अनुभूती प्रत्यक्ष घेता आली नाही, त्यामुळे सोहळा सर्वसमावेशक होणे अपेक्षित असल्याची अपेक्षाही व्यक्त करण्यात आली.
यावर आयुक्त कर्णिक यांनी पासेसचा अर्थ जागा आरक्षित असा नसून प्रथम येणाऱ्यांना आसनप्राधान्य होते, असे स्पष्ट केले. जागा नसल्यावर पोलिसांकडून प्रवेश बंद करण्यात आल्याचेही त्यांनी सांगितले. गोदाघाटावर येण्याचे आणि जाण्याचे वेगवेगळे मार्ग असल्याने चेंगराचेंगरीची परिस्थिती निर्माण होऊ नये हा त्यामागील उद्देश असल्याचे त्यांनी नमूद केले. नाशिक व त्र्यंबकेश्वर येथील ध्वजारोहण सोहळा पोलिसांच्या चोख बंदोबस्तामुळे निर्विघ्न पार पडल्याबद्दल कौतुकाची थापही यावेळी देण्यात आली.
कार्यशाळेत कोणते मुद्दे चर्चिले गेले
३१ ऑक्टोबरच्या बंदोबस्तातील प्रत्यक्ष अनुभव, गर्दीचे सूक्ष्म नियोजन आणि रमणी आयोगाच्या शिफारशी यांवर चर्चा झाली. दहशतवादी आव्हाने, संशयास्पद हालचालींची तातडीने ओळख आणि प्रतिबंधात्मक उपाययोजनांबाबत संबंधित विभागांच्या अधिकाऱ्यांनी मार्गदर्शन केले. आंदोलने आणि धार्मिक कार्यक्रमांच्या वेळी नागरिकांशी पोलिसांनी संयम आणि आदराने संवाद साधावा, याबाबत जनसंवाद व वर्तणूक प्रशिक्षण देण्यात आले. पोलिस, महापालिका, कुंभमेळा प्राधिकरण आणि इतर प्रशासकीय यंत्रणांमधील सुसूत्रता व परस्पर सहकार्यासाठी अधिक व्यापक समन्वय साधण्यावर भर देण्यात आला. तसेच प्रसारमाध्यमांशी समन्वय राखण्यासाठी आगामी काळात घ्यावयाच्या खबरदारीची जाणीव तज्ज्ञांनी करून दिली.
स्रोत: मूळ बातमी
Leave a Reply