दिवाळीनिमित्त नाशिक शहरातील मध्यवर्ती बाजारपेठ परिसरात होणारी गर्दी आणि वाहतूक कोंडी टाळण्यासाठी वाहतूक पोलिसांनी महत्त्वाचा निर्णय घेतला आहे. रविवार कारंजा, सांगली बँक सिग्नल, शालिमार आणि नेपाळी कॉर्नर या मार्गांवरून धावणाऱ्या सिटीलिंक बस तसेच मोठ्या वाहनांना प्रवेशबंदी करण्यात आली आहे. हे बदल ५ ते ११ नोव्हेंबरदरम्यान दररोज सकाळी दहा ते रात्री दहा वाजेपर्यंत लागू राहतील, अशी अधिसूचना वाहतूक शाखेचे उपआयुक्त चंद्रकांत गवळी यांनी जारी केली आहे.
बंद असलेले मार्ग
दिंडोरी नाका (निमाणी) आणि मालेगाव स्टॅन्डकडून सीबीएस-शालिमारकडे जाणारा मार्ग पूर्णपणे बंद राहील. पंचवटी कारंजा, रविवार कारंजा, सांगली बँक सिग्नल, नेपाळी कॉर्नर आणि शालिमार या मार्गावर सिटीलिंक बस व सर्व मोठी वाहने येऊ शकणार नाहीत.
पर्यायी मार्ग
दिंडोरी नाक्याकडून सीबीएसकडे जाणाऱ्या बस दिंडोरी नाका, पेठ फाटा, मखमलाबाद नाका, बायजाबाई छावणी, अशोकस्तंभ, सिद्धेश्वर मंदिर आणि रामवाडी मार्गे पुढे जातील. सीबीएसकडून पंचवटीकडे जाणाऱ्या बस सीबीएस, अशोकस्तंभ, चोपडा लॉन्स, जुना गंगापूर नाका, बायजाबाई छावणी, मखमलाबाद नाका आणि पेठ फाटा मार्गे दिंडोरी नाक्याकडे जातील. तर दिंडोरी नाक्यावरून नाशिकरोड आणि अंबडकडे जाणाऱ्या बस काट्या मारुती सिग्नल, संतोष टी पॉइंट, कन्नमवार पूल, द्वारका सर्कल आणि मुंबई नाका सर्कल मार्गे नाशिकरोड, अंबड, सातपूर व इतर भागात जातील. प्रवाशांनी या बदलांची नोंद घेऊन पर्यायी मार्गांचा वापर करावा, असे आवाहन करण्यात आले आहे.
स्रोत: मूळ बातमी
Leave a Reply