अनेक वर्षांपासून ज्याच्यासोबत संसाराचा गाडा ओढला, त्या पन्नालालचा निरोप घेऊन भाट कुटुंबीय अखेर बुधवारी मूळ गावी परतले. कुटुंबातील सदस्याप्रमाणे वाढवलेल्या पन्नालालला नाशिकमध्येच सोडून जाताना कुटुंबीयांचे डोळे पाणावले.
उपजीविकेचे साधन हरपले
श्री कालिका देवी यात्रोत्सवात पन्नालालच्या माध्यमातून भाट कुटुंबीय भाविकांचे मनोरंजन करत होते. मात्र पशुसंवर्धन कायद्याअंतर्गत पन्नालालला ताब्यात घेऊन त्याची रवानगी गोशाळेत करण्यात आली. पन्नालालच्या कार्यक्रमातून मिळणाऱ्या उत्पन्नावरच या कुटुंबाचा उदरनिर्वाह सुरू होता. त्याच्यापासून दुरावल्यामुळे रोजगाराचे साधन हिरावले गेले. नाशिकसारख्या मोठ्या शहरात राहण्याची पर्यायी व्यवस्था नसल्याने आणि खिशात पैसा नसल्याने राहणे, खाण्यापिण्याचा खर्च तसेच न्यायालयीन लढ्यासाठी वकिलाची फी भरण्याची आर्थिक क्षमताही कुटुंबाकडे उरली नाही. अशा परिस्थितीत नाशिकमध्ये दिवस काढणे कठीण झाल्याने कुटुंबाने मूळ गावी परतण्याचा निर्णय घेतला.
लढा सुरूच ठेवणार
गावी जाण्यापूर्वी कुटुंबाने नातलग आणि मित्रपरिवाराच्या मदतीने आर्थिक मदत उभी करून पन्नालालला पुन्हा मिळवण्यासाठी न्यायालयीन लढा सुरू ठेवण्याचा निर्धार केला आहे. पन्नालालला न्याय मिळवून देण्याची लढाई थांबणार नसली, तरी या लढ्यासाठी आधी पैशांची व्यवस्था करावी लागणार आहे. सध्या पन्नालाल गोशाळेत आहे. एका मुक्या जीवाच्या प्रकरणात त्याच्या माणसांच्या कुटुंबावर ओढवलेल्या या परिस्थितीची दखल कोण घेणार, असा प्रश्न समाजाच्या विविध स्तरांतून उपस्थित केला जाऊ लागला आहे.
स्रोत: मूळ बातमी
Leave a Reply