आयुष अभ्यासक्रमांची तिसरी प्रवेश यादी जाहीर

आयुष वैद्यकीय शिक्षणाच्या अंतर्गत असलेल्या आयुर्वेद, होमिओपॅथी आणि युनानी या तीन अभ्यासक्रमांच्या केंद्रीभूत प्रवेश प्रक्रियेची तिसरी यादी जाहीर करण्यात आली आहे. या तिसऱ्या यादीत तिन्ही अभ्यासक्रमांच्या राज्यातील २०४ वैद्यकीय महाविद्यालयांमधील १३ हजार ७५० जागांपैकी पहिल्या व दुसऱ्या फेरीत ७ हजार ११६ विद्यार्थ्यांनी महाविद्यालयात प्रवेश घेतला आहे. तिसऱ्या फेरीत ५ हजार ९६१ विद्यार्थ्यांना प्रवेशाची संधी मिळाली असून ६७३ जागा रिक्त आहेत. या रिक्त जागा स्ट्रे राऊंडसाठी उपलब्ध असतील.

तिन्ही अभ्यासक्रमांची स्थिती

आयुर्वेद अभ्यासक्रमाच्या तिसऱ्या यादीत राज्यातील १३९ महाविद्यालयांमधील ९ हजार ३०३ जागांपैकी आतापर्यंत ५ हजार ०४१ विद्यार्थ्यांनी प्रवेश घेतला आहे. तिसऱ्या फेरीत ४ हजार ०८५ विद्यार्थ्यांना प्रवेशाची संधी मिळाली असून १७७ जागा रिक्त आहेत. यामध्ये सहा शासकीय महाविद्यालयांत ३२९, शासकीय अनुदानित व महापालिकेच्या १७ महाविद्यालयांत ८६० आणि विनाअनुदानित ११६ महाविद्यालयांत २ हजार ८९६ विद्यार्थ्यांना प्रवेशाची संधी मिळाली आहे.

होमिओपॅथी अभ्यासक्रमाच्या तिसऱ्या यादीत राज्यातील ५७ महाविद्यालयांमधील ४ हजार ०१९ जागांपैकी १ हजार ८४७ विद्यार्थ्यांनी प्रवेश घेतला आहे. तिसऱ्या फेरीत १ हजार ६८३ विद्यार्थ्यांना प्रवेशाची संधी मिळाली असून ४८९ जागा रिक्त आहेत. यामध्ये दोन शासकीय महाविद्यालयांत ८२ आणि विनाअनुदानित ५५ महाविद्यालयांत १ हजार ६०१ विद्यार्थ्यांना प्रवेशाची संधी मिळाली आहे.

युनानी अभ्यासक्रमाच्या तिसऱ्या यादीत राज्यातील आठ महाविद्यालयांमधील ४२८ जागांपैकी २२८ विद्यार्थ्यांनी प्रवेश घेतला आहे. तिसऱ्या फेरीत १९३ विद्यार्थ्यांना प्रवेशाची संधी मिळाली असून सात जागा रिक्त आहेत. यामध्ये शासकीय अनुदानित व महापालिकेच्या तीन महाविद्यालयांत २७ आणि विनाअनुदानित पाच महाविद्यालयांत १६६ विद्यार्थ्यांना प्रवेशाची संधी मिळाली आहे.

प्रवेश निश्चित करण्याची मुदत

ज्या विद्यार्थ्यांना तिसऱ्या फेरीमध्ये महाविद्यालय मिळाले आहे, त्यांनी ४ नोव्हेंबरला सायंकाळी ५ वाजून ३० मिनिटांपर्यंत आवश्यक मूळ कागदपत्रे आणि आवश्यक शुल्काच्या डिमांड ड्राफ्टसह वाटप झालेल्या महाविद्यालयामध्ये प्रत्यक्ष उपस्थित राहून प्रवेश निश्चित करणे आवश्यक आहे. मुदतीत प्रवेश निश्चित न केल्यास मिळालेली संधी हुकण्याची शक्यता असल्याने विद्यार्थ्यांनी वेळेत महाविद्यालय गाठणे महत्त्वाचे ठरेल.

स्रोत: मूळ बातमी