नाशिक जिल्ह्यातील दुष्काळग्रस्त शेतकऱ्यांना शासनाकडून जाहीर झालेल्या आगाऊ मदतीच्या आणि नैसर्गिक आपत्तीमुळे झालेल्या नुकसानीपोटी मिळणाऱ्या अनुदानाच्या रकमेतून कोणत्याही प्रकारची कर्जवसुली करू नये, असे स्पष्ट निर्देश जिल्हाधिकाऱ्यांनी जिल्ह्यातील सर्व बँकांना दिले आहेत. शेतकऱ्यांची बँक खाती होल्ड करू नयेत, असेही या आदेशात म्हटले आहे.
१३ तालुक्यांतील शेतकऱ्यांसाठी प्रत्येकी पाच हजार रुपये
शासनाच्या आपत्ती व्यवस्थापन, मदत व पुनर्वसन विभागाच्या २७ ऑक्टोबर २०२६ रोजीच्या निर्णयानुसार, खरीप हंगाम २०२६ मधील दुष्काळग्रस्त १३ तालुक्यांतील शेतकऱ्यांसाठी प्रत्येकी पाच हजार रुपये आगाऊ मदत जाहीर करण्यात आली आहे. दिवाळीपूर्वी ही मदत शेतकऱ्यांच्या बँक खात्यांत जमा करण्याची कार्यवाही सुरू आहे. बाधित शेतकऱ्यांची संख्या मोठी असल्याने ही मदत कोणत्याही अडथळ्याशिवाय त्यांच्यापर्यंत पोहोचावी, यासाठी जिल्हाधिकाऱ्यांनी हे आदेश दिले आहेत.
नियम मोडल्यास आपत्ती व्यवस्थापन कायद्यानुसार कारवाई
शासनाकडून जमा होणारा मदतीचा निधी इतर कर्ज खात्यांमध्ये वळता केला जात असल्याचे किंवा शेतकऱ्यांची खाती होल्ड केली जात असल्याचे निदर्शनास आल्यास संबंधित बँकांवर कारवाई होऊ शकते. त्यामुळे नैसर्गिक आपत्तीमुळे बाधित शेतकऱ्यांना वेळोवेळी मिळणाऱ्या अनुदानाची रक्कम कोणत्याही परिस्थितीत त्यांच्या कर्ज खात्यात वळती किंवा वर्ग करू नये, असे निर्देश देण्यात आले आहेत.
तसेच, अनुदान किंवा मदतीची रक्कम ज्या बँक खात्यात जमा झाली आहे, त्या खात्यावर कोणत्याही परिस्थितीत होल्ड लावू नये, असेही आदेशात स्पष्ट करण्यात आले आहे. या आदेशाचे उल्लंघन झाल्यास आपत्ती व्यवस्थापन अधिनियम २००५ मधील तरतुदींनुसार संबंधितांवर गंभीर स्वरूपाची कारवाई केली जाईल, असा इशाराही देण्यात आला आहे. जिल्ह्यातील सर्व राष्ट्रीयीकृत व सहकारी बँका, जिल्हा अग्रणी बँक व्यवस्थापक, जिल्हा उपनिबंधक सहकारी संस्था आणि सर्व तहसीलदारांना या आदेशाची तातडीने अंमलबजावणी करण्याचे निर्देश देण्यात आले आहेत.
स्रोत: मूळ बातमी
Leave a Reply