नाशिक जिल्ह्यातील इगतपुरी येथे राहणाऱ्या निवृत्त रेल्वे कर्मचाऱ्याला जीवन प्रमाणपत्र अद्ययावत करण्याच्या नावाखाली तब्बल ५ लाख ९२ हजार रुपयांचा गंडा घालण्यात आला आहे. बँक खाते बंद होण्याची भीती दाखवून अज्ञात भामट्याने त्यांची वैयक्तिक माहिती आणि ओटीपी मिळवला आणि दोन खात्यांमधून रक्कम परस्पर हस्तांतरित केली. या प्रकरणी नाशिक ग्रामीण सायबर पोलिस ठाण्यात गुन्हा दाखल करण्यात आला आहे.
फोनवरून सुरू झालेला गंडा
२८ ऑक्टोबरला फिर्यादी घरी असताना त्यांच्या मोबाईलवर एका अज्ञात व्यक्तीचा फोन आला. फोन करणाऱ्याने आपण बँकेतून बोलत असल्याचे सांगितले. पेन्शन खात्याचे जीवन प्रमाणपत्र तातडीने अद्ययावत केले नाही तर बँक खाते बंद होईल, अशी बतावणी त्याने केली. त्यानंतर त्याने व्हॉट्सॲपवरून एका अर्जाची लिंक पाठवली. फिर्यादीने बँकेत जाऊन अर्ज भरण्याची इच्छा व्यक्त केली असता, हा अर्ज आत्ताच ऑनलाइन भरावा लागेल, असे सांगून त्यांना घाईत टाकण्यात आले. घाईगडबडीत त्यांनी लिंकवर क्लिक करून वैयक्तिक माहिती भरली आणि मोबाईलवर आलेला ओटीपीही भामट्याला सांगितला.
दुसऱ्या दिवशी उघडकीस आलेला प्रकार
२९ ऑक्टोबरला फिर्यादी इगतपुरी येथील बँक शाखेत पैसे काढण्यासाठी गेले असता खात्यात पैसे शिल्लक नसल्याचे समोर आले. खात्याचे विवरण काढले असता पेन्शन खाते आणि चालू खात्यातून विनापरवानगी एकूण ५ लाख ९२ हजार ४४५ रुपयांची रक्कम परस्पर हस्तांतरित झाल्याचे निदर्शनास आले. वरिष्ठ पोलिस निरीक्षक या प्रकरणाचा तपास करीत आहेत. बँकेशी संबंधित कोणतीही लिंक, अर्ज किंवा ओटीपी फोनवरून मागितला गेल्यास तो कधीही देऊ नये, असा धडा या घटनेतून पुन्हा एकदा समोर आला आहे.
स्रोत: मूळ बातमी
Leave a Reply