भारत-पाक आंतरराष्ट्रीय सीमेजवळ असलेल्या राजस्थानमधील श्रीगंगानगर येथून एक खळबळजनक घटना समोर आली आहे. सीमावर्ती भागातील रेल्वे ट्रॅकवर जोरदार स्फोट झाल्याची माहिती मिळताच संपूर्ण परिसरात भीतीचे वातावरण पसरले आहे. या ट्रॅकवरून अवघ्या काही वेळापूर्वीच एक ट्रेन गेली होती, त्यामुळे थोडक्यात भीषण दुर्घटना टळली आहे.
राजस्थानमधील श्रीगंगानगर येथील अनुपगड-सुरतगड रेल्वे रुळावर रात्री झालेल्या शक्तिशाली स्फोटामुळे रुळाचे दोन सिमेंटचे खांब तुटले. अनुपगड-सुरतगड ट्रेन गेल्यानंतर काही वेळातच ही घटना घडली. रेल्वे मार्गावरून एक प्रवासी ट्रेन गेल्यानंतर सुमारे ४५ मिनिटांनी स्फोट झाल्याची माहिती समोर आली आहे. या स्फोटामुळे रेल्वे रुळाखालील दोन सिमेंटचे ठोकळे पूर्णपणे फुटले आणि रुळांच्या मध्ये २ फूट खोल खड्डा पडला. ही घटना मंगळवारी रात्री सुमारे ९:४५ वाजता घडल्याची माहिती आहे.
सुरक्षा यंत्रणा घटनास्थळी
स्फोटाची माहिती मिळताच एटीएस, सीआयडी, श्वान पथक आणि रेल्वेची पथके घटनास्थळी दाखल झाली. सुरक्षेच्या कारणास्तव या मार्गावरील सर्व गाड्या रद्द करण्यात आल्या. या मार्गावरून जाणाऱ्या रेल्वेगाड्या बुधवारी सकाळी ६ वाजेपर्यंत रद्द करण्यात आल्या होत्या.
या अचानक झालेल्या शक्तिशाली धमाक्यामुळे सुरक्षा यंत्रणा आणि गुप्तचर विभाग पूर्णपणे सतर्क झाला आहे. हा घातपात होता का, याचा कसून तपास केला जात आहे. सीमावर्ती भागातील या स्फोटामागे समाजकंटक किंवा राष्ट्रविरोधी शक्तींचा हात होता का, याचा तपास सुरक्षा यंत्रणा करत आहेत.
तपासानंतरच नेमके कारण कळणार
पोलीस अधिकाऱ्यांनी दिलेल्या माहितीनुसार, पोलीस पथकाने घटनास्थळाची पाहणी केली असून इतर अधिकारीही तिथे उपस्थित होते. एफएसएल आणि एटीएसची पथकेही दाखल झाली आहेत. तपासानंतरच नेमके काय घडले हे कळू शकेल, असे अधिकाऱ्यांनी सांगितले. हा बॉम्बस्फोट होता की आणखी काही, हे आत्ताच सांगणे योग्य ठरणार नाही, असेही त्यांनी स्पष्ट केले. घटनास्थळाला भेट देऊन हे कसे घडले याचा शोध घेण्याचा प्रयत्न सुरू आहे.
अलीकडेच भिलवाडा येथे स्फोटकांनी भरलेल्या एका पिकअप ट्रकमध्ये स्फोट झाला होता. त्यात चालकाचा मृत्यू झाल्याची घटना घडली होती. या पार्श्वभूमीवर सीमावर्ती भागातील स्फोटाकडे सुरक्षा यंत्रणा गांभीर्याने पाहत आहे.
स्रोत: मूळ बातमी
Leave a Reply