छत्रपती संभाजीनगर शहरात सुरू असलेल्या नियमबाह्य बांधकामांवर महापालिकेने आता कडक भूमिका घेतली आहे. शहराच्या प्रत्येक भागात नव्याने उभी राहणारी बांधकामे अधिकृत परवानगीने सुरू आहेत की नियम डावलून, यावर बारकाईने लक्ष ठेवण्याची जबाबदारी संबंधित वॉर्ड अधिकारी आणि इमारत निरीक्षकांची असल्याचे महापालिका आयुक्त अमोल येडगे यांनी स्पष्ट केले आहे. येत्या आठ दिवसांच्या आत नव्या बांधकामांचे सर्वेक्षण पूर्ण करून अहवाल सादर करण्याचे आदेश त्यांनी दिले आहेत.
दुर्घटनेनंतर प्रशासनाला जाग
चिकलठाणा परिसरातील जालना रस्त्यावर एका नियमबाह्य बांधकामाचा स्लॅब कोसळून त्याखाली दबून एका मजुराचा मृत्यू झाला होता. मृतदेह बाहेर काढण्यासाठी प्रशासनाला तब्बल ३६ ते ४० तास अथक प्रयत्न करावे लागले होते. या पार्श्वभूमीवर सोमवारी सायंकाळी आयुक्तांनी अतिक्रमण हटाव विभाग, वॉर्ड अधिकारी आणि इमारत निरीक्षकांची बैठक बोलावली होती. वर्दळीच्या रस्त्यावरही नियमबाह्य बांधकाम उभे राहिल्याबद्दल त्यांनी तीव्र नाराजी व्यक्त केली. या बैठकीला अतिक्रमण हटाव विभागाचे संनियंत्रण अधिकारी संतोष वाहुळे, उपायुक्त सविता सोनवणे यांच्यासह सर्व वॉर्ड अधिकारी आणि इमारत निरीक्षक उपस्थित होते.
नियमितीकरणाची संधी, नंतर पाडकाम
एखादे बांधकाम नियमबाह्य आढळल्यास मालमत्ताधारकाला ते नियमित करून घेण्याची सूचना दिली जाईल. त्यानंतरही प्रतिसाद मिळाला नाही, तर ते बांधकाम पाडून टाकण्यात येईल, असे आयुक्तांनी स्पष्ट केले आहे. बांधकामासाठी नगर रचना विभागाची परवानगी घेतली आहे की नाही, याची तपासणी करण्यासाठी शासनाच्या बीपीएमएस ॲपचा वापर इमारत निरीक्षकांना करता येणार आहे. त्यासाठी ही सुविधा लवकरच उपलब्ध करून दिली जाणार आहे.
स्रोत: मूळ बातमी
Leave a Reply