दिवाळीच्या सणानिमित्त परदेशात राहणाऱ्या प्रियजनांना फराळ पाठवण्याची लगबग सुरू झाली आहे. भारतीय डाक विभागाच्या आंतरराष्ट्रीय पार्सल सेवेला धाराशिवकरांकडून चांगला प्रतिसाद मिळत आहे. धाराशिवच्या मुख्य डाकघरातून आतापर्यंत ३१ हून अधिक पार्सल परदेशात पाठवण्यात आली आहेत.
अमेरिका, रशिया आणि ऑस्ट्रेलियात फराळ
व्यवसाय, नोकरी आणि शिक्षणाच्या निमित्ताने जिल्ह्यातील अनेक नागरिक अमेरिका, ऑस्ट्रेलिया, रशिया यांसह विविध देशांत राहतात. त्यांचे नातेवाईक आणि कुटुंबीय गेल्या काही दिवसांपासून परदेशात फराळ पाठवण्याची तयारी करत आहेत. त्यातूनच आतापर्यंत ३१ हून अधिक फराळाची पार्सल परदेशात रवाना झाली असून अमेरिका, रशिया आणि ऑस्ट्रेलिया या देशांमध्ये फराळाचा गोडवा पोहोचवण्यात आला आहे. त्यामुळे परदेशात राहणाऱ्या भारतीयांना घरच्या फराळाची चव चाखता येणार आहे.
दिवाळी जवळ आली की डाक विभागाकडून विविध सेवा आणि योजनांची माहिती दिली जाते. खासगी व्यावसायिकांच्या तुलनेत किफायतशीर दर आणि विश्वासार्ह सेवेमुळे अनेक नागरिक डाक विभागाच्या सेवांना पसंती देतात. दिवाळीनिमित्त परदेशात तसेच देशांतर्गत फराळ आणि भेटवस्तू पाठवण्यासाठी डाक विभागाच्या पार्सल सेवांना यंदा चांगला प्रतिसाद मिळत आहे. घरापासून हजारो किलोमीटर दूर असलेल्या प्रियजनांपर्यंत फराळ, प्रेम आणि आपुलकी पोहोचवण्याचे काम या सेवांच्या माध्यमातून होत आहे.
पार्सल सेवांची वैशिष्ट्ये
विविध वस्तू, व्यापारी माल आणि अन्य उत्पादने योग्य पॅकिंग करून पार्सलद्वारे पाठवण्याची सुविधा उपलब्ध आहे. पार्सलचे किमान वजन २५० ग्रॅम, तर कमाल वजन ३५ किलो असू शकते. देशांतर्गत पार्सलच्या वितरणासाठी साधारण तीन ते पाच दिवस, तर आंतरराष्ट्रीय पार्सलसाठी सहा ते बारा दिवसांचा कालावधी लागतो. धाराशिवमधून देशातील विविध ठिकाणी तसेच जगभरातील २३० हून अधिक देशांमध्ये वस्तू व व्यापारी माल ट्रॅकिंग सुविधेसह किफायतशीर दरांत पाठवता येतो. नागरिक, व्यापारी आणि व्यावसायिकांनी या सुविधेचा लाभ घ्यावा, असे आवाहन डाक विभागाकडून करण्यात आले आहे.
स्रोत: मूळ बातमी
Leave a Reply