सिंधुदुर्ग जिल्ह्यात ईशान्य मोसमी वाऱ्यांचा पाऊस अजूनही जोरात सुरू आहे. सोमवारी सायंकाळी वैभववाडी तालुक्यात विजांच्या कडकडाटासह मुसळधार पाऊस कोसळला. या पावसाने संपूर्ण तालुक्याला झोडपून काढले. सावंतवाडी आणि कुडाळ तालुक्यांच्या काही भागांतही पावसाच्या सरी पडल्या.
रविवारी सावंतवाडी, वैभववाडी आणि वेंगुर्ला तालुक्यांच्या बहुतांश भागांत जोरदार सरी बरसल्या होत्या. रात्री उशिरापर्यंत अनेक ठिकाणी पाऊस सुरू होता. सोमवारी पहाटे सावंतवाडी तालुक्यातील अनेक भागांत पाऊस झाला. त्यानंतर मात्र पावसाने विश्रांती घेतली आणि दुपारपर्यंत कडक ऊन पडले होते.
सायंकाळी चारनंतर पावसाचा जोर वाढला
सायंकाळी चार वाजल्यानंतर वैभववाडी तालुक्यातील करूळ आणि भुईबावडा परिसरात विजांच्या गडगडाटासह जोरदार पावसाला सुरुवात झाली. तासाभरात संपूर्ण तालुक्यात मुसळधार पाऊस सुरू झाला. सुमारे तासभर झालेल्या या पावसामुळे नद्या आणि नाल्यांच्या पाणीपातळीत थोडी वाढ झाली. वैभववाडी शहरात सर्वत्र पाणी साचले होते. अनेक दिवसांनंतर शहरातील रस्त्यांवरून पाणी वाहताना दिसले.
कापणी केलेले पीक भिजल्याने शेतकऱ्यांचे नुकसान
सकाळपासून पावसाने उघडीप दिल्यामुळे शेतकऱ्यांनी भातपिकाची कापणी केली होती. मात्र सायंकाळच्या पावसात कापणी केलेले हे पीक भिजले. त्यामुळे अनेक शेतकऱ्यांचे नुकसान झाले आहे. दरम्यान, यंदा जिल्ह्यात पावसाची ३६ टक्के तूट नोंदवली गेली होती. सप्टेंबर महिन्यात अनेक नद्या-नाल्यांची पात्रे कोरडी पडू लागली होती. संभाव्य पाणीटंचाईवर मात करण्यासाठी जिल्हा प्रशासनाने १०,४३९ वनराई बंधारे बांधले आहेत. सध्या मात्र ईशान्य मोसमी पावसाने चांगली हजेरी लावली आहे. गेल्या दोन दिवसांत जिल्ह्याच्या काही भागांत झालेल्या पावसामुळे नद्या-नाल्यांची पाणीपातळी वाढली आहे. हा पाऊस संभाव्य पाणीटंचाई निवारणासाठी उपयुक्त ठरू शकतो.
स्रोत: मूळ बातमी
Leave a Reply