उजनी धरण परिसरात एआय डेटा सेंटर प्रकल्प आला म्हणजे पाणी गेले असे नाही, पाण्याचा वापर मात्र जपून झाला पाहिजे, असे मत ज्येष्ठ नेते शरद पवार यांनी व्यक्त केले आहे. बारामती येथील गोविंद बाग येथे रविवारी माध्यमांशी बोलताना त्यांनी ही भूमिका मांडली. ते स्वतः तिथे जाऊन लोकांचा विरोध का आहे हे समजून घेणार आहेत आणि त्यात काही बदल करण्याची गरज असल्यास त्याबाबतही विचार केला जाईल, असे त्यांनी सांगितले.
नवी दिल्लीत विरोधी पक्षांच्या नेत्यांनी आंदोलनासाठी एकत्र येण्यामागचे कारणही पवार यांनी स्पष्ट केले. केंद्राने मुख्य निवडणूक आयुक्त ज्ञानेशकुमार यांच्या बाबतीत योग्य वेळी निर्णय घेतला नाही, हे त्यामागचे कारण असल्याचे ते म्हणाले. असे असले तरी आपण मात्र राज्यातील टंचाईच्या स्थितीतून राज्याला सावरण्यावर लक्ष केंद्रित केले आहे, असे त्यांनी नमूद केले.
टंचाईग्रस्त शेतकऱ्यांशी संवाद साधणार
राज्यातील टंचाईच्या पार्श्वभूमीवर चार जिल्ह्यांतील शेतकऱ्यांशी संवाद साधणार असल्याचे पवार यांनी सांगितले. दिल्लीतील आंदोलनात राष्ट्रवादीच्या वतीने खासदार सुप्रिया सुळे सहभागी होत आहेत, तर आपण राज्यातील संकटात सापडलेल्या शेतकऱ्यांच्या अडचणी समजून घेणार असल्याचे त्यांनी नमूद केले. पिण्याचे पाणी आणि जनावरांना चारा या दोन महत्त्वाच्या बाबींवर लक्ष देणार असल्याचेही त्यांनी स्पष्ट केले.
पवार कुटुंबीय यंदा दिवाळी साजरी करणार नाहीत
राज्यभरातून दिवाळीला पवार कुटुंबीयांना भेटायला लोक येतात. मात्र, उपमुख्यमंत्री अजित पवार यांच्या निधनाच्या पार्श्वभूमीवर यंदा पवार कुटुंबीय दिवाळी साजरी करणार नाहीत, असे शरद पवार यांनी सांगितले.
स्रोत: मूळ बातमी
Leave a Reply