इनोव्हा कारमधून दोन गायींची चोरी, घटना सीसीटीव्हीत कैद

किनवट तालुक्यातील उनकेश्वर येथे इनोव्हा कारमधून आलेल्या चौघांनी दोन गायी चोरून नेल्याची घटना घडली आहे. गायींना भूल देणारे इंजेक्शन टोचून त्यांना कारमध्ये टाकण्यात आले. ही संपूर्ण घटना ग्रामपंचायतीच्या सीसीटीव्ही कॅमेऱ्यात कैद झाली असून या प्रकरणी मांडवी पोलिस ठाण्यात गुन्हा दाखल करण्यात आला आहे.

सीसीटीव्ही फुटेजमुळे प्रकार उघड

उमरी बाजार येथून २७ ऑक्टोबरच्या रात्री जनावरे चोरीला गेल्याची घटना ताजी असतानाच त्याच्या जवळच्या उनकेश्वर गावातही असाच प्रकार घडला. जिल्हा परिषद शाळेसमोरील मोकळ्या जागेत रात्री पाच ते सहा जनावरे बसली होती. त्यावेळी उनकेश्वर मंदिराकडून उमरीकडे जाणाऱ्या रस्त्याने काळ्या रंगाची इनोव्हा कार आली. त्यातून काळे कपडे घातलेला एक व्यक्ती खाली उतरला. त्याने विलंब न करता एका काळ्या गायीला इंजेक्शन टोचले आणि त्यानंतर दुसऱ्या पांढऱ्या गायीला इंजेक्शन दिले. या प्रकारामुळे इतर गायी पळून गेल्या.

त्यानंतर एका शेतकऱ्याची गाय कारमध्ये टाकण्यात आली. दुसऱ्या शेतकऱ्याची गाय बेशुद्ध न झाल्याने तिला दोरीने बांधून गावाबाहेर नेण्यात आले आणि कारमध्ये टाकण्यात आले. शेतकऱ्यांनी गायींचा शोध घेतला, मात्र त्या मिळून आल्या नाहीत. त्यानंतर ग्रामपंचायतीच्या सीसीटीव्ही फुटेजची तपासणी केली असता चोरीचा प्रकार उघडकीस आला.

तपास सुरू

एका शेतकऱ्याने दिलेल्या तक्रारीवरून दोन गायींच्या चोरीप्रकरणी मांडवी पोलिस ठाण्यात गुन्हा दाखल करण्यात आला आहे. सहाय्यक पोलिस निरीक्षकांच्या मार्गदर्शनाखाली पुढील तपास सुरू असल्याचे सांगण्यात आले आहे.

स्रोत: मूळ बातमी