छत्रपती संभाजीनगरमध्ये वाहन, फार्मा आणि अभियांत्रिकी उद्योगांची भक्कम पायाभरणी झाली आहे. आता या औद्योगिक ताकदीला वैद्यकीय संशोधन, उपकरण निर्मिती, दर्जेदार आरोग्यसेवा आणि वैद्यकीय पर्यटनाची जोड दिल्यास हे शहर देशातील महत्त्वाचे मेडिकल इनोव्हेशन हब बनू शकते. त्यासाठी पारंपरिक औद्योगिक विकासाच्या पलीकडे जाऊन हेल्थ इकॉनॉमी उभारण्याची गरज असून, मेडिकल डिव्हाइस पार्क, संशोधन केंद्रे, कौशल्य विकास संस्था आणि जागतिक दर्जाच्या आरोग्य सुविधा यांचा एकात्मिक विकास करावा लागेल, असे मत लाइफलाइन मेडिकल डिव्हाइसेसचे व्यवस्थापकीय संचालक डॉ. विक्रांत भाले यांनी व्यक्त केले.
डॉ. भाले हे मूळचे छत्रपती संभाजीनगरचे आहेत. शहरातच शिक्षण पूर्ण करून त्यांनी मुंबईतील लोकमान्य टिळक मेडिकल कॉलेजमधून एमबीबीएस केले. वैद्यकीय शिक्षणानंतर महानगरात करिअर करण्याऐवजी त्यांनी पुन्हा संभाजीनगरमध्ये परत येत २०११ मध्ये लाइफलाइन मेडिकल डिव्हाइसेस प्रा.लि.ची स्थापना केली. गेल्या तेरा वर्षांत कंपनीच्या लेन्सद्वारे २० लाखांहून अधिक रुग्णांची दृष्टी पुनर्स्थापित झाली. ऑरिकमध्ये दुसरा अत्याधुनिक उत्पादन प्रकल्प उभारण्याचे काम सुरू असून, त्यातून संशोधन, उत्पादन आणि निर्यात क्षमता आणखी वाढणार आहे.
शहरातच आहेत सर्व घटकांची बीजे
वाहन उद्योग, फार्मा आणि अभियांत्रिकी क्षेत्रात भक्कम परिसंस्था असलेले हे शहर आता मेडिकल टुरिझम आणि मेडिकल डिव्हाइस उत्पादनासाठी सज्ज आहे, असे डॉ. भाले म्हणाले. त्यासाठी आवश्यक उद्योग, संशोधन, कौशल्य, वैद्यकीय सेवा आणि पायाभूत सुविधा या सर्व घटकांची बीजे शहरात आधीच आहेत. त्यांना योग्य दिशा आणि धोरणाची जोड मिळाली, तर छत्रपती संभाजीनगर पुढील दशकात देशातील महत्त्वाचे मेडिकल हब बनू शकते. केवळ उद्योग वाढवून विकास होत नाही; त्यासोबत दर्जेदार आरोग्यसेवा, संशोधन, वैद्यकीय शिक्षण आणि मेडिकल उपकरण निर्मितीची परिसंस्था उभारणे तितकेच आवश्यक आहे.
आंध्र प्रदेशमध्ये सरकारी मदतीतून मेडिकल डिव्हाइस पार्क उभारण्यात आला आणि अनेक बहुराष्ट्रीय कंपन्या तेथे आल्या, त्याच धर्तीवर संभाजीनगरमध्येही हा प्रयोग यशस्वी होऊ शकतो, असे त्यांनी सांगितले. मेडिकल डिव्हाइस म्हणजे अभियांत्रिकी आणि वैद्यकीय ज्ञानाचा संगम आहे. या दोन्ही क्षेत्रांत शहराची ताकद असल्याने येथे संशोधन, उत्पादन आणि निर्यातक्षम उद्योग उभारण्यासाठी पोषक वातावरण आहे. अशा उद्योगांमुळे मराठवाड्यातील अभियांत्रिकी आणि विज्ञान शाखेतील विद्यार्थ्यांना मुंबई, पुणे, बंगळुरू किंवा हैदराबादकडे जाण्याची गरज उरणार नाही.
कंपनीची वाटचाल आणि पुढील दिशा
डॉ. भाले यांच्या कंपनीने मोतीबिंदू शस्त्रक्रियेसाठी लागणाऱ्या लेन्समध्ये संशोधन करून दोन पेटंट मिळवले. आज कंपनी २४ प्रकारच्या लेन्सचे उत्पादन करते. कंपनीतील १२० कर्मचाऱ्यांपैकी ८० टक्के महिला आहेत. मेडिकल उपकरणांमध्ये सूक्ष्म गुणवत्ता नियंत्रण अत्यंत महत्त्वाचे असल्याने महिलांची बारकाई आणि जबाबदारीची भावना उद्योगासाठी मोठी ताकद ठरली, असे निरीक्षण त्यांनी नोंदवले. दोन वर्षे संशोधन केल्यानंतर २०१३ मध्ये उत्पादन सुरू झाले. सुरुवातीची काही वर्षे संघर्षाची गेली, मात्र आज कंपनीचा ९५ टक्के व्यवसाय विदेशात आहे आणि ४५ देशांमध्ये निर्यात होते.
केंद्र शासनाच्या मोतीबिंदू निर्मूलन मोहिमेत योजनेतून होणाऱ्या उपचारांचा खर्च डॉक्टरांना मिळण्यात अडचणी आहेत. त्या सोडवल्या तर मोतीबिंदू निर्मूलनात आणखी मोठे काम होईल, अशी अपेक्षाही त्यांनी व्यक्त केली. मोतीबिंदू ऑपरेशनमध्ये आयात केलेले म्हणजेच भारी हा गैरसमज दूर झाला पाहिजे; आपले भारतीय उत्पादनही त्याच तोडीच्या गुणवत्तेचे आहे, असेही ते म्हणाले. मेडिकल टुरिझम किंवा मेडिकल डिव्हाइस उद्योग उभारण्यासाठी केवळ कारखाने पुरेसे नाहीत; आधुनिक कन्व्हेन्शन सेंटर, हॉटेल उद्योग, वाहतूक व्यवस्था आणि सुयोग्य शहरी नियोजन आवश्यक आहे, असेही त्यांनी सांगितले.
स्रोत: मूळ बातमी
Leave a Reply