जळगावात लाचखोरीचा विळखा कायम; यंदा ३७ प्रकरणे उघड

शासकीय कार्यालयात सर्वसामान्यांची कामे करून देण्यासाठी लाचेची मागणी होण्याचे प्रकार जळगाव जिल्ह्यात अद्याप थांबलेले नाहीत. भ्रष्टाचाराविरोधात कारवाई होत असतानाही जिल्ह्यात लाचखोरीचा आलेख कायम असल्याचे लाचलुचपत प्रतिबंधक विभागाच्या आकडेवारीवरून दिसून येते. गतवर्षी जिल्ह्यात ४५ कारवाया करण्यात आल्या होत्या, तर चालू वर्षात आतापर्यंत ३७ प्रकरणे उघडकीस आली असून ५० जणांना अटक करण्यात आली आहे.

शासकीय दाखले, विविध परवानग्या, शासकीय योजनांचा लाभ आणि कार्यालयीन मंजुरी यांसारख्या कामांसाठी नागरिकांना शासकीय कार्यालयांमध्ये जावे लागते. अशा वेळी काही अधिकारी किंवा कर्मचारी काम करून देण्यासाठी पैशांची मागणी करतात. काम अडवले जाईल, वारंवार कार्यालयात हेलपाटे मारावे लागतील किंवा तक्रार केल्यानंतर अडचणी निर्माण होतील, या भीतीने अनेक नागरिक तक्रार करण्याचे टाळतात.

तक्रारदाराच्या ठिकाणीच पोहोचणार पथक

नागरिकांमध्ये भ्रष्टाचाराविरोधात जागरूकता निर्माण करण्यासाठी २६ ऑक्टोबर ते १ नोव्हेंबरदरम्यान दक्षता जनजागृती सप्ताह राबविण्यात येत आहे. या सप्ताहाची संकल्पना सत्यनिष्ठेच्या संस्कृतीच्या माध्यमातून राष्ट्रसमृद्धी ही आहे. लाचेची मागणी झाल्यास नागरिकांनी जळगाव येथील कार्यालयात येण्याची आवश्यकता नाही; संपर्क साधल्यानंतर विभागाचे पथक तक्रारदाराच्या ठिकाणी पोहोचून पुढील प्रक्रिया करेल. तक्रारदाराची माहिती गोपनीय ठेवण्याबाबत आवश्यक खबरदारी घेतली जाते.

लाच मागणाऱ्या शासकीय अधिकारी-कर्मचाऱ्यांसह त्यांच्या वतीने लाचेची मागणी करणाऱ्या खासगी मध्यस्थांवरही कारवाई केली जाते. या सप्ताहादरम्यान नागरिकांना लाचखोरीचे दुष्परिणाम, भ्रष्टाचारविरोधी कायदेशीर तरतुदी आणि तक्रार करण्याच्या प्रक्रियेची माहिती दिली जात आहे.

लाचेची रक्कम १५ ते २० दिवसांत परत

लाचखोरीच्या प्रकरणात नागरिकांना लाचेपोटी द्यावी लागलेली रक्कम परत मिळण्याचीही तरतूद आहे. संबंधित प्रकरणातील आवश्यक प्रक्रिया पूर्ण झाल्यानंतर लाचेची रक्कम साधारणतः १५ ते २० दिवसांत धनादेशाद्वारे तक्रारदाराला परत मिळू शकते. त्यामुळे पैसे परत मिळणार नाहीत किंवा तक्रार केल्याने आर्थिक नुकसान होईल, अशी भीती नागरिकांनी बाळगू नये, असे आवाहन करण्यात आले आहे. भ्रष्टाचारमुक्त समाजाच्या निर्मितीसाठी नागरिकांची जागरूकता महत्त्वाची असून, लाचेची मागणी झाल्यास घाबरून न जाता लाचलुचपत प्रतिबंधक विभागाशी संपर्क साधावा, असे लाचलुचपत प्रतिबंधक विभाग, जळगावचे पोलिस उपअधीक्षक योगेश ठाकूर यांनी म्हटले आहे. तक्रारीसाठी टोल फ्री क्रमांक १०६४, संपर्क क्रमांक ७५८८६६१०६४, दूरध्वनी ०२५७-२२३५४७७, ई-मेल dyspacbjalgaon@gmail.com आणि acbmaharashtra.gov.in हे संकेतस्थळ उपलब्ध आहे.

स्रोत: मूळ बातमी