सिंहस्थ कुंभमेळ्याच्या पार्श्वभूमीवर नाशिक जिल्ह्यातील प्रमुख तीर्थक्षेत्र असलेल्या सप्तशृंगगडावर भाविकांच्या स्वागताची तयारी सुरू झाली आहे. आद्य स्वयंभू शक्तिपीठ म्हणून ओळखल्या जाणाऱ्या श्रीक्षेत्र सप्तशृंगगडावर देवीच्या दर्शनासाठी सिंहस्थ काळात मोठ्या संख्येने भाविक येण्याची शक्यता आहे. ही संभाव्य गर्दी लक्षात घेऊन देवी ट्रस्ट, ग्रामपंचायत, राज्य परिवहन महामंडळ, पोलिस प्रशासन आणि विविध शासकीय विभागांच्या समन्वयातून सुविधांचे नियोजन केले जात आहे.
रस्ते, दर्शन व्यवस्था आणि सुरक्षा
नांदुरी ते सप्तशृंगगड हा सुमारे १० किलोमीटरचा घाटरस्ता गडावरील दळणवळणाचा मुख्य मार्ग आहे. सार्वजनिक बांधकाम विभागामार्फत रस्त्याचे काँक्रिटीकरण आणि तीव्र वळणांची सुधारणा केली जात असून, ही कामे पूर्णत्वाच्या दिशेने आहेत. सुसज्ज बसस्थानकासाठी १५ कोटी रुपयांचा निधी मंजूर असला, तरी जागा निश्चितीसाठी परवानगी मिळालेली नसल्याने काम सुरू होऊ शकलेले नाही. सिंहस्थातील वाहतूक निर्बंध आणि बससेवेचे अंतिम वेळापत्रक प्रशासनाच्या निर्णयानुसार ठरेल. नवरात्रोत्सवाच्या काळात गडावर दीड हजारांहून अधिक पोलिसांचा बंदोबस्त होता आणि ३११ सीसीटीव्ही कॅमेऱ्यांमधून देखरेख ठेवली होती. सिंहस्थ काळातही गर्दीच्या प्रमाणानुसार बंदोबस्त, वाहतूक नियंत्रण, गर्दी व्यवस्थापन आणि आपत्ती व्यवस्थापनाची यंत्रणा सक्षम ठेवावी लागणार आहे. भाविकांना सुरक्षित आणि सुलभ दर्शन मिळावे, यासाठी मंदिरात प्रवेश आणि बाहेर पडण्याचे मार्ग स्वतंत्र ठेवण्याचे नियोजन आहे. मंदिर २४ तास खुले ठेवण्याची तरतूद प्रस्तावित व्यवस्थेत आहे. दर्शनरांगांच्या शिस्तबद्ध नियमनासाठी १५ बाऱ्यांचे नियोजन असून, प्रत्येक बारीवर सुरक्षारक्षक, मंदिर कर्मचारी आणि पोलिस असतील. मुख्य प्रवेशद्वार, पहिली पायरी आणि दसरा टप्प्यावरील दत्तमंदिराजवळ डोअर फ्रेम मेटल डिटेक्टर आहेत, तर सुरक्षारक्षकांना १२ हॅन्ड मेटल डिटेक्टर दिले आहेत.
आरोग्य, पाणी आणि विकासकामे
नवरात्रोत्सवात आरोग्य विभागामार्फत ४२ वैद्यकीय अधिकारी, ८० आरोग्य कर्मचारी, सहा फिरती वैद्यकीय पथके आणि सहा रुग्णवाहिका तैनात होत्या. पिण्याच्या पाण्यासाठी प्रत्येकी दोन हजार लिटर क्षमतेच्या १२ टाक्या, सहा हजार लिटर क्षमतेची एक टाकी आणि वॉटर कूलरची सुविधा होती. भक्तनिवास परिसरात आठ लाख लिटर क्षमतेच्या पाणीसाठवण टाक्या आहेत. स्वच्छतेसाठी कायमस्वरूपी आणि फिरती अशी एकूण १०० स्वच्छतागृहे असून, ५० सफाई कर्मचाऱ्यांमार्फत परिसर स्वच्छ ठेवण्याचे नियोजन आहे. ट्रस्टच्या विविध भक्तनिवासांमध्ये एकूण २१६ खोल्या उपलब्ध आहेत. राज्य शासनाने सप्तशृंगगड विकासासाठी ८१ कोटी ८६ लाख ६१ हजार रुपयांचा निधी मंजूर केला आहे. त्यातून नांदुरी येथील भक्तनिवासासाठी आठ कोटी ५१ लाख, गडावरील पोलिस ठाण्यासाठी सात कोटी ७१ लाख, नांदुरी बसस्थानकासाठी पाच कोटी ५० लाख, वीजवाहिन्या भूमिगत करण्यासाठी पाच कोटी ४४ लाख, भूमिगत रस्ते व सिमेंट रस्त्यांसाठी चार कोटी ६० लाख, वनजमिनीवरील कामांसाठी चार कोटी ३८ लाख, मंदिराच्या पहिल्या पायरी मार्गावरील डोमसाठी तीन कोटी ९२ लाख, नक्षत्र बगीच्यासाठी एक कोटी ९४ लाख, घाट रस्त्यावरील दरड प्रतिबंधासाठी एक कोटी ९२ लाख आणि स्वच्छतागृहासाठी एक कोटी ५२ लाख रुपये उपलब्ध आहेत. यातील बहुतांश कामे पूर्णत्वास असून, काही कामे प्रगतिपथावर आहेत.
स्रोत: मूळ बातमी
Leave a Reply