विधान परिषदेच्या पदवीधर आणि शिक्षक मतदारसंघांच्या निवडणुकीचा निकाल जाहीर झाला आहे. या निवडणुकीत महायुतीला फक्त दोन जागा जिंकता आल्या, तर महाविकास आघाडीने तीन जागा पटकावल्या आहेत. त्यामुळे महायुतीसाठी हा निकाल मोठा धक्का मानला जात आहे. आघाडीतील अंतर्गत संघर्ष आणि मतभेदांमुळे हा पराभव झाल्याचे बोलले जात आहे.
निकालानंतर महायुतीतील वाद चव्हाट्यावर आले आहेत. शिंदेसेनेमुळे पराभव झाल्याचा उघड आरोप भाजप आणि राष्ट्रवादी काँग्रेसकडून करण्यात आला आहे, तर शिंदेसेनेनेही भाजपवर प्रत्यारोप केले आहेत. या पार्श्वभूमीवर महायुतीने पराभवावर मंथन करण्याचा निर्णय घेतला आहे.
प्रमुख नेत्यांची बैठक
येत्या एक-दोन दिवसांत मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि सुनेत्रा पवार या महायुतीच्या तिन्ही प्रमुख नेत्यांची बैठक होणार आहे. पराभवाचे विश्लेषण, अंतर्गत वाद आणि भविष्यातील उपाययोजना यावर या बैठकीत चर्चा होणार असल्याचे सांगितले जात आहे. या बैठकीत विशेषतः पुणे आणि छत्रपती संभाजीनगरमधील पराभवावर भर दिला जाणार आहे. तसेच शिंदे गटाकडून अमरावतीचा मुद्दा मांडला जाण्याची शक्यता आहे.
आरोप-प्रत्यारोपांची मालिका
निकालानंतर भाजपचे प्रवक्ते नवनाथ बन यांनी रवींद्र धंगेकर यांच्यावर कारवाईची मागणी केली होती. धंगेकर यांनी पक्षाचे नुकसान केल्याचा आरोप त्यांनी केला असून शिंदे यांनी संबंधितांवर कारवाई करावी, असे ते म्हणाले आहेत. दुसरीकडे धंगेकर यांनी राज्यातील नेतृत्वावर जनता नाराज असून नेतृत्वबदलाची मागणी केली आहे. शिंदेसेनेचे आनंद परांजपे यांनी अमरावती आणि संभाजीनगरात विरोधी प्रचार झाल्याचा सवाल उपस्थित केला आहे, तर शिंदे गटाचे आमदार अब्दुल सत्तार यांनी आपण उघडपणे शरद पवार गटाचा प्रचार केल्याचे म्हटले आहे. या बैठकीत धंगेकर यांच्यावर कारवाई होणार की नाही, याकडे सर्वांचे लक्ष लागले आहे.
स्रोत: मूळ बातमी
Leave a Reply