नाशिक : गिरणारे महामार्ग क्रमांक २६ वरील मखमलाबाद शिव ते यशवंतनगरदरम्यानचा रस्ता सध्या धोकादायक बनला आहे. या मार्गावरील डांबरी थर मशीनच्या मदतीने काढण्यात आल्याने रस्त्याचा पृष्ठभाग जागोजागी खडबडीत झाला आहे. त्यामुळे दुचाकीवरून प्रवास करणाऱ्यांना वाहन चालवणे कठीण होत असून अपघातांचे प्रमाण वाढले आहे. या मार्गावर महिनाभरात चार जणांचा मृत्यू झाल्याचा दावा स्थानिक नागरिकांनी केला आहे.
या महामार्गाच्या कामाला नुकतीच सुरुवात झाली आहे. महानगरपालिका हद्दीत रस्त्याचे खोदकाम सुरू असून त्यानुसार वाहतुकीचे नियोजनही करण्यात आले आहे. मात्र, महापालिका हद्दीबाहेरच्या भागासाठी स्वतंत्र ठेकेदार असल्याने तेथे खोदकाम न करता केवळ मशीनने डांबरी थर काढण्यात आला. त्यामुळे रस्त्यावर खडबडीत रेघा पडल्यासारखी स्थिती निर्माण झाली असून दुचाकी घसरण्याचा धोका वाढला आहे. सततच्या अपघातांमुळे ठेकेदाराच्या कामकाजाबद्दल नागरिकांमध्ये तीव्र संताप व्यक्त होत आहे.
खडबडीत रस्ता आणि भरधाव पिकअप वाहनांचा धोका
एकीकडे रस्त्याची अवस्था बिकट असल्याने दुचाकीस्वारांना जीव मुठीत धरून प्रवास करावा लागत आहे, तर दुसरीकडे या मार्गावरून धावणाऱ्या पिकअप वाहनांचा वेगही चिंतेचा विषय बनला आहे. मागील आठवड्यात मुंगसरे फाटा येथे यशवंतनगर येथील दाम्पत्य दुचाकीवरून प्रवास करत असताना भरधाव पिकअप वाहनाने त्यांना धडक दिली. या भीषण अपघातात तिघांचा मृत्यू झाला होता. तसेच शुक्रवारी मखमलाबाद येथील शक्ती गवळी हा युवक दुचाकीवरून गिरणारेच्या दिशेने जात असताना हॉटेल शिवारसमोर भरधाव पिकअपने त्याला धडक दिली. या अपघातात त्याच्या पायाला गंभीर दुखापत झाली.
तातडीने डांबरीकरण करण्याची मागणी
या मार्गावर वारंवार अपघात घडत असल्याने संबंधित ठेकेदाराने तातडीने रस्त्यावर डांबरीकरण करावे, अशी मागणी स्थानिक शेतकरी व नागरिकांनी केली आहे. तोपर्यंत वाहतूक सुरक्षित राहण्यासाठी आवश्यक उपाययोजना कराव्यात आणि पोलिसांनी या मार्गावर वाहतूक नियंत्रणासाठी विशेष लक्ष देऊन भरधाव वाहनांवर कारवाई करावी, अशीही त्यांची मागणी आहे. दत्तूनाना पिंगळे, अक्षय कातड, भिका सूर्यवंशी, प्रदीप पिंगळे, सुदर्शन पिंगळे, मोतीराम पिंगळे आणि शंकर तिदमे यांनी ही मागणी केली आहे.
Leave a Reply