कतारमधील दोहा येथील वेस्ट एंड पार्क आंतरराष्ट्रीय क्रिकेट स्टेडियमवर एसीसी मेन्स आशिया कप रायझिंग स्टार्स २०२६ स्पर्धेतील आठवा सामना भारत अ आणि पाकिस्तान अ यांच्यात सुरू आहे. या सामन्यात पाकिस्तानने नाणेफेक जिंकून प्रथम फलंदाजी करण्याचा निर्णय घेतला. चांगली सुरुवात करूनही पाकिस्तानचा संघ ३१३ धावांवर सर्वबाद झाला. त्यामुळे भारतासमोर विजयासाठी ३१४ धावांचे लक्ष्य आहे.
पाकिस्तानची फलंदाजी
पाकिस्तानच्या सलामीवीरांनी आक्रमक सुरुवात केली. शमील हुसेन आणि माज सदाकत यांनी पहिल्याच चेंडूपासून आक्रमक खेळ केला आणि तीन षटकांत ४० धावा केल्या. शमीलने अवघ्या २३ चेंडूंत चार चौकार आणि दोन षटकारांसह ३३ धावा केल्या. कर्णधार तिलक वर्मा याने फिरकीपटू आयुष बडोनीकडे चेंडू सोपवला. हर्षित राणाच्या चेंडूवर मोठा फटका मारण्याच्या प्रयत्नात शमील बाद झाला आणि ही जोडी फुटली. पाकिस्तानची पहिली विकेट ६६ धावांवर पडली. त्यानंतर राणाने यष्टिरक्षक रोहैल नजीरला खातेही उघडू दिले नाही.
दोन विकेट पडल्यानंतर माज सदाकत आणि हसन नवाज यांनी डाव सावरला. सदाकतने ६३ चेंडूंत सहा चौकार आणि एका षटकारासह ५९ धावा केल्या. सूर्यांश शेडगेने त्याला बाद करून पाकिस्तानला तिसरा धक्का दिला. त्यानंतर हसन नवाजने भारतीय गोलंदाजांवर वर्चस्व गाजवत ८२ चेंडूंत पाच चौकार आणि चार षटकारांसह सर्वाधिक ७९ धावा केल्या. कर्णधार अब्दुल समदने ३५ चेंडूंत २८ धावांची साथ दिली, मात्र तो धावबाद झाला. मध्यम फळीत फरहान युसूफने ४८ चेंडूंत चार चौकार आणि दोन षटकारांसह ५६ धावांची झुंजार खेळी करत संघाला तीनशे धावांचा टप्पा ओलांडून दिला. तळाच्या फळीत मोहम्मद इम्रानने १४ चेंडूंत २३ धावांचे उपयुक्त योगदान दिले. अखेर भारतीय गोलंदाजांनी पाकिस्तानला शेवटच्या षटकात ३१३ धावांवर सर्वबाद केले.
भारतीय गोलंदाजांची कामगिरी
पाकिस्तानने आक्रमक सुरुवात केल्यानंतर त्यांचा संघ सहज ३५० धावा करेल, असे वाटत होते. मात्र भारतीय गोलंदाजांनी शेवटी जोरदार पुनरागमन केले. भारताकडून हर्षित राणा, प्रिन्स यादव, सूर्यांश शेडगे आणि विप्रज निगम यांनी प्रत्येकी दोन विकेट घेतल्या, तर आयुष बडोनीला एक विकेट मिळाली. आता भारताला जिंकवण्याची जबाबदारी फलंदाजांवर आहे. वैभव सूर्यवंशी आणि अभिषेक शर्मा यांच्याकडून सर्वांना मोठ्या अपेक्षा आहेत.
Leave a Reply