आज सोशल मीडियावर व्हिडिओ आणि रील्स बनवणारे अनेकजण दिसतात. काहीजण छंद म्हणून हे करतात, तर काहींनी यालाच कमाईचे साधन बनवले आहे. अमेरिकेतील एका परिचारिकेच्या बाबतीत तर हे माध्यम इतके यशस्वी ठरले की, तिने आपली नोकरीच सोडून पूर्णवेळ कंटेंट तयार करण्याचा निर्णय घेतला.
सारा अॅन या अमेरिकेतील अॅरिझोना येथे राहतात. त्या एकल पालक असून परिचारिका म्हणून नोकरी करत होत्या. सुमारे १८ महिन्यांपूर्वी त्यांनी सोशल मीडियावर कंटेंट तयार करायला सुरुवात केली. सुरुवातीला त्या परिचारिका म्हणून काम करताना येणारे अनुभव आणि एकल पालक म्हणून समोर येणाऱ्या अडचणी शेअर करत असत.
साध्या आयुष्याला मिळाला प्रतिसाद
सुरुवातीला आपले साधे आयुष्य लोकांना पाहायला का आवडेल, आपले व्हिडिओ लोक पाहतील का, असा प्रश्न त्यांच्या मनात होता. मात्र हळूहळू त्यांच्या कंटेंटला प्रतिसाद मिळू लागला आणि वेगवेगळ्या ब्रँड्सकडून कामाच्या ऑफर्स येऊ लागल्या.
सात महिन्यांत १.७५ कोटींचे करार
सारा यांनी इन्स्टाग्रामवर एक व्हिडिओ शेअर करून आपल्या कमाईचा हिशोब सांगितला. त्यांच्या माहितीनुसार मे ते नोव्हेंबर या सात महिन्यांच्या काळात त्यांनी ब्रँड्ससोबत एकूण १ लाख ८७ हजार ७४५ डॉलर, म्हणजेच जवळपास १.७५ कोटी रुपयांचे करार केले.
कंटेंट क्रिएशनमधून सात महिन्यांत झालेली कमाई परिचारिका म्हणून मिळणाऱ्या त्यांच्या वर्षभराच्या कमाईपेक्षाही जास्त होती. त्यामुळे त्यांनी घेतलेला निर्णय त्यांच्यासाठी प्रचंड फायद्याचा ठरला. आता कंटेंट तयार करण्यासोबतच कुटुंबाला वेळ देता येणार असल्याचे त्यांनी म्हटले आहे.
इन्स्टाग्रामवर त्यांचे जवळपास ८२ हजार ७०० फॉलोअर्स आहेत. आपल्या प्रवासाबद्दल सांगताना त्यांनी फॉलोअर्सचे आभार मानले आहेत. सोशल मीडियावरून कमाई करणे आपल्यासारख्या सामान्य माणसालाही शक्य आहे, असे वाटणाऱ्यांना सुरुवात करण्यासाठी प्रोत्साहन मिळावे, हा आपला उद्देश असल्याचे त्यांनी म्हटले आहे.
Leave a Reply