२२ नोव्हेंबर रोजी सायंकाळी सहा वाजता सायरनचा आवाज ऐकू येईल आणि त्यानंतर संपूर्ण राज्य काही काळ अंधारात जाईल. तब्बल ७५ जिल्ह्यांमध्ये वीजपुरवठा खंडित केला जाणार आहे. मात्र घाबरण्याचे कारण नाही, कारण हे एक नियोजित मॉक ड्रिल आहे. उत्तर प्रदेशमध्ये २२ नोव्हेंबर रोजी हे मॉक ड्रिल आयोजित करण्यात आले आहे. या पार्श्वभूमीवर सरकारच्या वतीने आधीच अलर्ट जारी करण्यात आला आहे.
मॉक ड्रिलमध्ये काय होणार?
सायंकाळी सहा वाजता सायरन वाजताच ७५ जिल्ह्यांमधला विद्युतपुरवठा खंडित केला जाणार आहे. वीज गेल्यानंतर नागरिकांना सुरक्षित ठिकाणी जाण्याच्या सूचना देण्यात येतील आणि त्यानंतर आपत्ती व्यवस्थापन पथके पुढील सर्व सूत्रे आपल्या हाती घेतील. या काळात जिल्हा प्रशासनाने अलर्ट मोडवर राहावे, अशा सूचनाही देण्यात आल्या आहेत. हवाई हल्ल्याची सूचना देणारा हा सायरन तब्बल दोन मिनिटे वाजवला जाणार आहे. त्यानंतर धोका टळल्याचा सायरन वाजेल आणि खंडित झालेला विद्युतपुरवठा पुन्हा सुरळीत करण्यात येईल.
मॉक ड्रिल कशासाठी?
राज्यात युद्धासारखी परिस्थिती निर्माण झाली, तर त्यापासून बचाव कसा करायचा आणि अशा परिस्थितीला तोंड कसे द्यायचे, हे नागरिकांना दाखवून देण्यासाठी हे मॉक ड्रिल करण्यात येत आहे. आणीबाणीच्या वेळी नागरिकांनी कसे वागावे, सुरक्षित ठिकाणी कसे जावे आणि प्रशासनाने कोणती पावले उचलावीत, याचा सराव या ड्रिलमधून केला जाणार आहे.
Leave a Reply