पाकिस्तानचे हवामानबदल मंत्री मुसादिक मसूद मलिक सध्या भारताच्या दौऱ्यावर आहेत. दिल्लीत होणाऱ्या शांघाय सहकार्य संघटनेच्या संवाद मंचात सहभागी होण्यासाठी ते भारतात आले आहेत. हा मंच २० ते २२ नोव्हेंबरदरम्यान आयोजित करण्यात आला आहे. या दौऱ्यात मलिक आग्र्यातील ताजमहाललाही भेट देणार आहेत. दोन्ही देशांमधील संबंध सुधारण्याच्या दिशेने हा दौरा महत्त्वाचा मानला जात आहे.
पाच ठिकाणांची मागणी, चार ठिकाणांना परवानगी
पाकिस्तानच्या उच्चायोगाने भारताकडे पाच ठिकाणी भेट देण्याची परवानगी मागितली होती. आग्र्यातील ताजमहाल, दिल्ली हाट, हुमायूंचा मकबरा, किल्ला राय पिथौरा आणि हजरत निजामुद्दीन दर्गा अशी ती पाच ठिकाणे होती. यापैकी चार ठिकाणांना जाण्याची परवानगी देण्यात आली. मात्र सुरक्षेच्या कारणामुळे निजामुद्दीन दर्ग्याला जाण्याची परवानगी नाकारण्यात आली. मलिक यांनी दिल्लीतील निजामुद्दीन दर्ग्यात जाण्याची इच्छा व्यक्त केली होती.
पहलगाम हल्ल्यानंतरचा पहिला दौरा
मे २०२५ मधील पहलगाम दहशतवादी हल्ल्यानंतर दोन्ही देशांमधील संबंध तणावात आले होते. त्या तणावानंतर पाकिस्तानमधून भारतात येणारे मलिक हे पहिले मंत्री ठरणार आहेत. पाकिस्तानकडून कोणी या परिषदेत सहभागी होणार नसल्याची चर्चा होती. मात्र मलिक या मंचात पाकिस्तानचे प्रतिनिधित्व करत आहेत. मतभेद बाजूला ठेवून संवाद करणे आवश्यक असल्याचे मलिक यांनी म्हटले आहे. दोन्ही देशांमधील संबंध वेगाने बदलत आहेत आणि मतभेद असतानाही दोन्ही देश एका मंचावर आले आहेत, असेही त्यांनी सांगितले. या मंचावर अनेक मुद्द्यांवर चर्चा होईल, असेही त्यांनी नमूद केले.
दरम्यान, मलिक यांच्या भारत दौऱ्यावर संजय राऊत यांनी जोरदार टीका केली आहे. पाकिस्तानचे मंत्री आता भारत दौऱ्यावर येत असल्याचे सांगून त्यांनी टीका केली. काही महिन्यांपूर्वी भारत आणि पाकिस्तान यांच्यात युद्धाची स्थिती निर्माण झाली होती, असेही राऊत यांनी म्हटले आहे.
Leave a Reply