हिवाळ्यात राज्यातील अनेक ठिकाणी सकाळी आणि रात्री खूप दाट धुके असते. अशा वेळी समोरचे अनेकदा काहीच दिसत नाही. त्यामुळे गाडी चालवणेही कठीण जाते. दाट धुक्यामुळे अपघात होण्याची शक्यता असते. अशा वेळी योग्य दिव्यांचा वापर करणे फार गरजेचे असते. योग्य दिवे वापरले नाहीत तर पुढचे काहीच दिसणार नाही आणि अपघात होऊ शकतो.
लो बीम हेडलाइटचा वापर करा
दाट धुक्यात गाडी चालवताना नेहमी लो बीम हेडलाइटचा वापर करावा. यामुळे रस्त्यावरील समोरच्या गोष्टी दिसायला मदत होते. अशा वातावरणात केवळ वाहनाचा वेग कमी करणे पुरेसे नसते, तर योग्य दिवे वापरणे महत्त्वाचे असते. यासोबत वाहन चालवण्याचे काही महत्त्वाचे नियम पाळणेही तितकेच आवश्यक असते.
हाय बीमचा वापर टाळा
धुक्यात हाय बीमचा वापर टाळायला हवा. धुक्यात हाय बीमचा प्रकाश पाण्याच्या सूक्ष्म थेंबांवर पडून परत डोळ्यांकडे येतो. त्यामुळे समोरील रस्ता अधिक अस्पष्ट दिसू शकतो. त्यामुळे दाट धुक्यात हाय बीम लावणे धोकादायक ठरू शकते.
फॉग लॅम्पचा योग्य वापर
दाट धुक्यात कारमध्ये फ्रंट फॉग लॅम्प असल्यास ते सुरू करावेत. हे दिवे कारच्या खालच्या बाजूला असतात आणि रस्त्याचा जवळचा भाग पाहण्यास मदत करतात. कमी दृश्यमानता असताना रिअर फॉग लॅम्प सुरू केल्याने मागील वाहनांना तुमची कार ओळखणे सोपे जाते. मात्र धुके कमी झाल्यावर हे दिवे बंद करावेत, जेणेकरून मागील चालकांना त्रास होणार नाही.
Leave a Reply