पंढरपूरमध्ये होणाऱ्या कार्तिकी यात्रेसाठी येणाऱ्या सामान्य भाविकांना जलद आणि सुलभ दर्शन मिळावे, यासाठी यात्रा काळात व्हीआयपी दर्शनाची व्यवस्था पूर्णपणे बंद ठेवण्यात येणार आहे. दर्शनासाठी लागलेल्या रांगेत घुसखोरी होऊ नये, याबाबतही प्रशासनाला सक्त सूचना देण्यात आल्या आहेत.
ग्रामविकास आणि पंचायतराज मंत्री तथा सोलापूरचे पालकमंत्री जयकुमार गोरे यांनी बुधवारी (१८ नोव्हेंबर) कार्तिकी वारीच्या पूर्वतयारीचा आढावा घेण्यासाठी झालेल्या बैठकीत हे निर्देश दिले. आषाढी वारीप्रमाणेच कार्तिकी वारीही यशस्वी व्हावी, यासाठी सर्व विभागांनी समन्वयाने काम करावे, असे त्यांनी सांगितले. यात्रेच्या कामांसाठी निधीची कोणतीही कमतरता भासू देणार नाही, अशी ग्वाहीही त्यांनी दिली.
बैठकीला कोण उपस्थित होते
या बैठकीला जिल्हाधिकारी एस. कार्तिकेयन, जिल्हा परिषदेचे मुख्य कार्यकारी अधिकारी कुशल जैन, पोलीस अधीक्षक अतुल कुलकर्णी, श्री विठ्ठल-रुक्मिणी मंदिर समितीचे सहअध्यक्ष गहिनीनाथ महाराज औसेकर, आमदार समाधान आवताडे आणि आमदार अभिजीत पाटील (व्हिडिओ कॉन्फरन्सद्वारे) यांच्यासह प्रमुख अधिकारी उपस्थित होते.
दर्शन रांगेत कोणतीही घुसखोरी होणार नाही, याची दक्षता पोलीस प्रशासन आणि मंदिर समितीने घ्यावी, असे गोरे यांनी सांगितले. मंदिर समितीने नेमलेल्या सुरक्षारक्षकांची चारित्र्य पडताळणी करून अहवाल सादर करावा आणि कर्मचाऱ्यांनी भाविकांशी सौजन्याने वागावे, अशा सूचनाही त्यांनी केल्या.
भाविकांच्या सोयीसाठी सूचना
चंद्रभागा नदीपात्रात होडीतून प्रवास करणाऱ्या भाविकांसाठी पुरेशा प्रमाणात लाइफ जॅकेट उपलब्ध करून द्यावेत, असे पालकमंत्र्यांनी सांगितले. प्रादेशिक परिवहन विभागाने वारकऱ्यांची वाहने विनाकारण अडवून त्यांची गैरसोय करू नये, अशीही सूचना त्यांनी केली.
पंढरपूर शहरातील स्वच्छतेला सर्वोच्च प्राधान्य देत रस्ते तातडीने खड्डेमुक्त करावेत. दर्शन रांगेत स्वच्छ पिण्याचे पाणी, शौचालये, मॅट आणि प्रकाशाची व्यवस्था करावी, असेही त्यांनी सांगितले. वाखरी येथील जनावरांच्या बाजारात आवश्यक सुविधा देऊन बाजार संपल्यानंतर पालखीतळाची तातडीने स्वच्छता करण्याचे निर्देशही त्यांनी दिले.
बैठकीच्या सुरुवातीला उपविभागीय अधिकारी सचिन इथापे, मुख्याधिकारी महेश रोकडे आणि मंदिर समितीचे कार्यकारी अधिकारी श्रीकांत यादव यांनी वारीच्या तयारीचा व शासकीय महापूजेच्या नियोजनाचा आढावा सादर केला.
Leave a Reply