शिवसेना पक्ष आणि चिन्ह कोणाचे, यावर सुप्रीम कोर्टात पुन्हा एकदा सुनावणीला सुरुवात झाली आहे. शिवसेना ठाकरे गटाची आहे की शिंदे गटाची, या प्रश्नावर न्यायालयात युक्तिवाद सुरू आहे. शिंदे गटाचे वकील धृव मेहता हे शिंदे गटाच्या वतीने युक्तिवाद करत असून त्यांनी मोठा दावा केला आहे. या दाव्यामुळे ठाकरे गटाच्या अडचणी वाढण्याची शक्यता व्यक्त केली जात आहे.
कर्नाटक सत्तास्थापनेचा दाखला
युक्तिवादादरम्यान धृव मेहता यांनी 2019 च्या कर्नाटकातील सत्तास्थापनेचा दाखला दिला. या प्रकरणात दहाव्या अनुसूचीनुसार कारवाई करता येणार नाही, असा दावा त्यांनी केला. शिंदे गटाच्या कोणत्याही पदाधिकाऱ्यांनी राजीनामा दिला नसल्याचेही त्यांनी सांगितले. टर्म संपेपर्यंत अपात्र करायचे की नाही, याचे अधिकार विधानसभा अध्यक्षांकडे आहेत, असा दावा मेहता यांनी केला आहे.
युती तुटल्याचा युक्तिवाद
मेहता यांनी भाजप आणि शिवसेना यांच्या युतीचाही दाखला दिला. निवडणुकीआधी भाजप आणि शिवसेनेची युती होती, मात्र निवडणुकीनंतर ती तोडण्यात आली. हे मतदारांचा अपमान असल्याचे आणि त्यामुळे पक्ष कार्यकर्ते नाराज झाल्याचे मेहता म्हणाले. शिवसेना आणि भाजपची विचारधारा एक आहे, मात्र ज्या सरकारचे नेतृत्व उद्धव ठाकरेंकडे होते, त्याचे नेतृत्व शिवसेनाच करत होती, असा युक्तिवाद त्यांनी केला. उद्धव ठाकरेंनी राजीनामा दिला आणि सरकार कायम ठेवण्यासाठी शिंदे मुख्यमंत्री बनले, असा दावाही मेहता यांनी केला आहे.
युक्तिवाद पूर्ण करण्याचे न्यायालयाचे निर्देश
धृव मेहता यांनी सलग तीन सुनावण्यांमध्ये युक्तिवाद केला आहे. यावेळी आजच युक्तिवाद पूर्ण करा, असे न्यायालयाने मेहता यांना सांगितले. त्यावर लवकरात लवकर युक्तिवाद पूर्ण करण्याचाच आपला प्रयत्न असल्याचे मेहता यांनी न्यायालयात सांगितले. यापूर्वी ठाकरे गटाच्या वतीने कपिल सिब्बल यांनी न्यायालयात युक्तिवाद करून ठाकरे गटाची बाजू मांडली होती.
Leave a Reply