शिंदे गटाच्या नेत्या शायना एनसी यांनी दिवंगत नेते बाळासाहेब ठाकरे यांचा फोटो फाडल्याने राज्याच्या राजकारणात नवा वाद निर्माण झाला आहे. शिंदे गटाच्या प्रवक्त्यांनी ‘बिलॉन्गिंग : अ जर्नी ऑफ लव्ह’ या पुस्तकाची काही पाने फाडली. त्याचवेळी शायना एनसी यांनी बाळासाहेब ठाकरे यांचा फोटो फाडला. या कृतीनंतर ठाकरे गटाचे नेते आक्रमक झाले आहेत. सोनिया गांधी यांचे पुस्तक फाडल्याने काँग्रेसनेही शिंदे गटावर जोरदार टीका केली आहे.
या प्रकरणावर ठाकरे गटाचे खासदार संजय राऊत यांनी अवघ्या दोन शब्दांत शिंदे गटाला सुनावले आहे. काँग्रेस नेते अतुल लोंढे यांनी ट्वीट करत शिंदे गटावर टीका केली होती. शिंदेंच्या नेत्यांनी अनावधानाने नाही, तर जाणीवपूर्वक बाळासाहेबांचा फोटो फाडला आहे, असा आरोप लोंढे यांनी केला. अतुल लोंढे यांचेच ट्वीट रिट्विट करत संजय राऊत यांनी ‘बकवास लेकाचे’ असे म्हणत शिंदे गटाला सुनावले.
## मुंबई महापालिकेत पडसाद
शायना एनसी यांनी फोटो फाडल्याचे पडसाद मुंबई महापालिकेतही उमटले. ठाकरे गटाच्या नगरसेवकांनी सभागृहात जोरदार घोषणाबाजी केली. पालिकेच्या विरोधी पक्षनेत्या किशोरी पेडणेकर यांनीही शिंदे गटावर टीका केली. ठाकरे गटाच्या नेत्या सुषमा अंधारे यांनीही या कृतीचा निषेध करत आक्षेप नोंदवला. ज्या बाळासाहेबांमुळे ते मोठे झाले, आज त्यांचाच फोटो फाडला जातोय, हे चुकीचे आहे, असे मत अंधारे यांनी व्यक्त केले.
दरम्यान, आता शायना एनसी आणि उपमुख्यमंत्री एकनाथ शिंदे यांच्यात चर्चा होणार आहे. त्यामुळे यावर शायना एनसी नेमके काय स्पष्टीकरण देणार, हे पाहणे महत्त्वाचे ठरणार आहे.
Leave a Reply