उत्तराखंडच्या टिहरी गढवाल जिल्ह्यात मंगळवारी पहाटे एक भीषण रस्ते अपघात घडला. प्रवाशांनी भरलेली एक बस लोखंडी संरक्षक कठडा तोडून खोल दरीत कोसळली. गुलर पुलापासून सुमारे शंभर मीटर खाली असलेल्या दरीत पडलेली ही बस गुलर गड नदीत जाऊन पडली. या दुर्घटनेत नऊ प्रवाशांचा मृत्यू झाला असून पंचवीस जण जखमी झाले आहेत. बसमध्ये एकूण चौतीस प्रवासी होते, अशी माहिती अधिकाऱ्यांनी दिली आहे.
पोलिसांनी दिलेल्या माहितीनुसार, ही बस पहाटे तीन वाजून पंधरा मिनिटांनी हरिद्वारहून निघाली होती. हरिद्वारहून जोशीमठाकडे जाणारी ही बस पहाटे चार वाजून पन्नास मिनिटांच्या सुमारास गुलर पुलाजवळ आली असता अचानक नदीत कोसळली. पहाटेच्या अंधारात घडलेल्या या अपघाताची माहिती मिळताच परिसरात खळबळ उडाली.
मुख्यमंत्र्यांनी व्यक्त केले दुःख
या दुर्घटनेबद्दल मुख्यमंत्री पुष्करसिंह धामी यांनी तीव्र दुःख व्यक्त केले आहे. जखमींना योग्य वैद्यकीय उपचार मिळावेत, तसेच अपघातग्रस्त आणि त्यांच्या कुटुंबीयांना सर्वतोपरी मदत करावी, असे निर्देश त्यांनी अधिकाऱ्यांना दिले आहेत. जखमी लवकर बरे व्हावेत, अशी सदिच्छाही त्यांनी व्यक्त केली आहे.
राज्यपालांकडूनही संवेदना
राज्यपालांनीही टिहरी गढवाल आणि रुद्रप्रयाग जिल्ह्यातील उखीमठ परिसरात झालेल्या रस्ते अपघातांतील जीवितहानीबद्दल दुःख व्यक्त केले आहे. मृतांना श्रद्धांजली अर्पण करून त्यांनी मृतांच्या कुटुंबीयांप्रति संवेदना व्यक्त केल्या. तसेच जखमींच्या प्रकृतीत लवकर सुधारणा व्हावी, अशी प्रार्थनाही त्यांनी केली आहे.
Leave a Reply