बार्शी तालुक्यातील आगळगाव येथे रविवारी आयोजित करण्यात आलेल्या रेड्यांच्या टकरीदरम्यान एका रेड्याचा मृत्यू झाला. आगळगावजवळील धनगरवाडी परिसरात या टकरी घेण्यात आल्या होत्या. यामध्ये बार्शी शहरातील ‘मोहन किंग’ नावाच्या रेड्याचा टकरीदरम्यान मृत्यू झाला. या घटनेचा व्हिडिओ समाजमाध्यमांवर पसरल्यानंतर प्राणीमित्रांसह नागरिकांमधून तीव्र संताप व्यक्त होत आहे.
परंपरेच्या नावाखाली क्रूरता?
परंपरेच्या नावाखाली मनोरंजनासाठी मुक्या जनावरांना एकमेकांसमोर उभे करून त्यांच्या संघर्षाचा आनंद लुटला जातो. त्यात एखाद्या प्राण्याचा जीव गेला तरी त्याची पर्वा केली जात नाही. ही कोणती माणुसकी, असा सवाल नागरिकांमधून उपस्थित होत आहे. मनोरंजनासाठी प्राण्यांना अशा प्रकारे एकमेकांशी लढवणे योग्य आहे का, यावरही या घटनेनंतर चर्चा सुरू झाली आहे.
बंदी असतानाही आयोजन कसे?
सोलापूर जिल्ह्यात रेड्यांच्या टकरींवर कायदेशीर बंदी असताना आगळगावात हजारो लोकांच्या उपस्थितीत अशा टकरींचे आयोजन नेमके कसे झाले, असा प्रश्न यानिमित्ताने ऐरणीवर आला आहे. या आयोजनाला पोलिस प्रशासनाची परवानगी होती का? परवानगी नसेल तर प्रतिबंधित प्रकार उघडपणे सुरू असताना प्रशासनाला त्याची माहिती कशी मिळाली नाही? माहिती असूनही दुर्लक्ष झाले का? असे प्रश्न उपस्थित होत आहेत.
या घटनेची पोलिस प्रशासनाने तातडीने दखल घेऊन आयोजकांची ओळख पटवावी, संबंधितांवर प्राण्यांवरील क्रूरता प्रतिबंधक कायद्यानुसार कारवाई करावी आणि भविष्यात अशा प्रकारांना आळा घालावा, अशी मागणी प्राणीमित्रांकडून केली जात आहे.
Leave a Reply