ठाकरे गटाचे खासदार संजय राऊत यांच्याविरोधातील अवमान याचिकेवर आज सर्वोच्च न्यायालयात सुनावणी पार पडली. ही याचिका सर्वोच्च न्यायालयाच्या बार असोसिएशनकडून दाखल करण्यात आली आहे. राऊत यांनी स्वतः न्यायालयात हजर राहावे असे न्यायालयाचे आदेश होते. मात्र राऊत यांनी न्यायालयात ऑनलाईन पद्धतीने उपस्थिती लावली. या प्रकरणाची पुढील सुनावणी आता ८ डिसेंबर रोजी होणार आहे. इतक्या मोठ्या स्वरूपाच्या प्रकरणात माफी मनापासून असायला हवी. केवळ बुद्धीने दिलेली माफी नको. राऊतांनी मनापासून माफी मागावी, असे सर्वोच्च न्यायालयाने म्हटले आहे.
आजच्या सुनावणीमध्ये न्यायालयात मोठी खडाजंगी झाली. न्यायालयाने स्पष्टपणे सांगितले की, राऊत हे प्रतिष्ठित नागरिक आहेत. ते उत्कृष्ट संसदपटूही आहेत. त्यामुळे त्यांच्याकडून अशा पद्धतीची विधाने अपेक्षित नाहीत, अशी महत्त्वपूर्ण टिप्पणी न्यायालयाने केली. यावेळी राऊतांच्या वकिलांनी सांगितले की, ते सामनाचे संपादकही आहेत.
मनापासून माफी हवी
न्यायालयाने असेही म्हटले की, आम्ही वकिली जेव्हापासून करत होतो, तेव्हापासून संजय राऊतांची भाषणे ऐकत आलो आहोत. तुम्ही वरिष्ठ राजकारणी आहात. अनेक राजकीय चर्चांमध्ये तुम्ही असता. तुम्ही सांगा काय करायचे ते. सर्वोच्च न्यायालयाच्या सरन्यायाधीशांबद्दल केलेले विधान अत्यंत आक्षेपार्ह आहे, अशी टिप्पणी न्यायालयाने केली.
ज्येष्ठ पत्रकार निखिल वागळे यांचे वकील इंदिरा जयसिंग यांनी न्यायालयासमोर युक्तिवाद केला. त्यांनी सांगितले की, निखिल वागळेंकडून न्यायालयाची बिनशर्त माफी मागितली गेली आहे. त्यावेळी संजय राऊतांच्या वकिलांनीही सांगितले की, संजय राऊतांनीही न्यायालयाची माफी मागितली आहे. मात्र सर्वोच्च न्यायालयाच्या बार असोसिएशनच्या अध्यक्षांकडून सांगण्यात आले की, १९ ऑक्टोबर रोजी राऊत यांनी ही पोस्ट केल्याप्रकरणी त्यांनी आपल्या विधानाबद्दल माफी मागितली असली, तरी राऊत यांनी सोशल मीडियावर न्यायालयाच्या विरोधात आणखी पोस्ट केल्या आहेत. त्यांनी अल्बेनियाच्या सर्वोच्च न्यायालयाचा एक फोटोही पोस्ट केला होता, ज्यामध्ये निदर्शक त्या इमारतीला आग लावताना दिसत आहेत. अशा पद्धतीची विधाने खपवून घेतली जाणार नाहीत, असा युक्तिवाद झाला.
८ डिसेंबरला हजर राहण्याचे आदेश
आजची सुनावणी संपली तेव्हा न्यायालयाने स्पष्ट आदेश दिले की, संजय राऊत आणि निखिल वागळे या दोघांनीही न्यायालयापुढे हजर राहावे. दरम्यान, संजय राऊतांच्या वकिलाने न्यायालयाला विनंती केली की, राऊतांना कॅन्सरसारखा आजार असून इतरही आरोग्याच्या समस्या आहेत. त्यामुळे त्यांना पुढील सुनावणीवेळी न्यायालयात उपस्थित राहण्यापासून सवलत देण्यात यावी. ते ऑनलाईन पद्धतीने न्यायालयात उपस्थित राहू शकतील, असे वकिलाने सांगितले. मात्र ही विनंती न्यायालयाने फेटाळली आणि उपस्थितीच्या सूचनांचे पालन व्हावे, असे म्हटले आहे.
Leave a Reply