बंगालच्या उपसागरात तीव्र कमी दाबाचे क्षेत्र तयार झाले असून त्याचे रुपांतर आता चक्रीवादळात होऊ लागले आहे. याचा परिणाम दक्षिण भारतातील अनेक राज्यांमध्ये जाणवेल. यामुळे देशातील १३ राज्यांमध्ये वादळी वाऱ्यासह तुफान पाऊस पडण्याचा इशारा हवामान विभागाने दिला आहे. या पावसादरम्यान ताशी १०० किमीच्या वेगाने वारे वाहण्याची शक्यता आहे. तर इकडे महाराष्ट्रात थंडीचा कडाका चांगलाच वाढला आहे. मुंबईसह राज्यातील अनेक शहरांमध्ये थंडी वाढली आहे.
कोणत्या राज्यांत पावसाचा इशारा?
भारतीय हवामान विभागाच्या माहितीनुसार, आज १३ राज्ये आणि केंद्रशासित प्रदेशांमध्ये पावसाची शक्यता आहे. यामध्ये तामिळनाडू, पुदुचेरी, कराईकल, केरळ, माहे, आंध्र प्रदेश, यानम, रायलसीमा, तेलंगणा, अरुणाचल प्रदेश, आसाम, मेघालय आणि अंदमान व निकोबार बेटांचा समावेश आहे. दक्षिण भारतातील किनारपट्टीच्या भागात सोसाट्याच्या वाऱ्यांसह पावसाचा इशारा देण्यात आला आहे. बंगालच्या उपसागरात वाऱ्याचा वेग ताशी ८० ते ९० किलोमीटरपर्यंत जाऊ शकतो. तर ताशी १०० किलोमीटरच्या वेगाने वारे वाहण्याची शक्यता आहे.
महाराष्ट्रात थंडीचा कडाका
दुसरीकडे महाराष्ट्रामध्ये थंडीचा कडाका चांगलाच वाढला आहे. बंगालच्या उपसागरात चक्रीवादळ तयार होत असल्याने ढगाळ वातावरण तयार झाले आहे. यामुळे तापमानात मोठी घट झाली आहे. महाराष्ट्रात तापमानात पुढचे काही दिवस चढ-उतार पाहायला मिळतील. राज्यातील अनेक जिल्ह्यांत आज ढगाळ वातावरण राहील. काही जिल्ह्यांमध्ये पाऊस देखील पडण्याचा अंदाज हवामान विभागाने वर्तवला आहे.
राज्यात कमाल तापमानात घट झाली असली, तरी देखील किमान तापमानात चढ-उतार पाहायला मिळत आहे. आज कमाल आणि किमान तापमानात चढ-उतार कायम राहण्याचा अंदाज आहे. सोमवारी राज्यातील सर्वांत निचांकी तापमानाची नोंद निफाड येथे झाली. निफाडमध्ये ११.१ अंश सेल्सिअस तापमान होते. तर धुळ्यात १२ अंश सेल्सिअस आणि जेऊर येथे १२ अंश सेल्सिअस तापमानाची नोंद करण्यात आली.
Leave a Reply