नवी दिल्लीत २० ते २२ नोव्हेंबरदरम्यान शांघाय सहकार्य परिषद पार पडत आहे. या परिषदेसाठी पाकिस्तानने आपले पाणीपुरवठा आणि पर्यावरण मंत्री मुसादिक मलिक यांना अधिकृत प्रतिनिधी म्हणून नियुक्त केले आहे. सिंधू जल करार स्थगित केल्यानंतर भारताला उघड धमकी देणारे हेच मंत्री आता दिल्लीत येणार असल्याने त्यांच्या दौऱ्याकडे सर्वांचे लक्ष लागले आहे.
धमकीचे प्रकरण काय होते?
पहलगाम येथील दहशतवादी हल्ल्यानंतर भारताने पाकिस्तानला चोख प्रत्युत्तर देत सिंधू जल करार स्थगित केला होता. पाकिस्तानकडे जाणारे पाणी रोखल्याने तेथे मोठी अडचण निर्माण झाली होती. त्यावेळी मुसादिक मलिक यांनी भारताला धमकी दिली होती. पाण्यावर हात मारणाऱ्यांचे हात काढून टाकू, अशी भूमिका त्यांनी घेतली होती. मात्र भारताने त्यांच्या धमकीला भीक न घालता बंदी उठवणार नसल्याची भूमिका घेतली होती.
आता शांघाय सहकार्य परिषदेत मलिक सहभागी झाल्यास तीन वर्षांनंतर भारतात येणारे ते पाकिस्तानचे पहिले मंत्री ठरतील. परंपरा आणि सांस्कृतिक जतन यावर चर्चा करण्यासाठी आयोजित या परिषदेत पाण्याच्या मुद्द्यावर वादग्रस्त विधाने करणाऱ्या मंत्र्याला पाठवल्यामागे राजकारण असल्याची चर्चा सुरू आहे.
पाकिस्तानचा डाव काय असू शकतो?
पाकिस्तान या परिषदेच्या मंचावरून भारताचा विरोध करण्याचा आणि सिंधू जल कराराचा मुद्दा उपस्थित करण्याचा प्रयत्न करू शकते, अशी सूत्रांची माहिती आहे. सांस्कृतिक विषयांवर चर्चा होणाऱ्या परिषदेत पाणी वाटपाचा वाद आणण्याचा प्रयत्न इस्लामाबादकडून होण्याची शक्यता आहे. भारत याला कसे उत्तर देणार, हे पाहावे लागणार आहे. मलिक यांच्या नावाला भारताकडून मंजुरी दिली जाते का, हेही पाहणे महत्त्वाचे ठरणार आहे.
एससीओ परिषद कशी असणार?
पंतप्रधान नरेंद्र मोदी या परिषदेच्या उद्घाटन समारंभात हजेरी लावणार आहेत. ही परिषद भारताच्या सांस्कृतिक आणि परराष्ट्र मंत्रालयाने आयोजित केली आहे. तीन दिवस चालणाऱ्या या परिषदेत कला, वास्तुकला, भाषा आणि साहित्य, धार्मिक आणि प्रचलित परंपरा यांवर चर्चा होणार आहे. परिषदेसाठी २५ देशांना निमंत्रण देण्यात आले असून १५ देशांनी सहभागी होणार असल्याचे सांगितले आहे. पाकिस्तानने मलिक हे आपले प्रतिनिधी असतील, अशी घोषणा केली आहे.
Leave a Reply