जळगाव जिल्ह्यात प्राधान्य कुटुंब योजनेखाली १,०५,९९५ इतका अतिरिक्त इष्टांक निर्माण झाला आहे. अंत्योदय योजनेसाठीही ३,२७४ कार्डांचा इष्टांक उपलब्ध झाला आहे. त्यामुळे जिल्ह्यातील १,०५,९९५ हून अधिक नागरिकांना नव्याने रेशनचा लाभ देता येणे शक्य होणार आहे, अशी माहिती जिल्हा पुरवठा अधिकारी महेश चौधरी यांनी दिली.
सार्वजनिक वितरण व्यवस्थेत पारदर्शकता वाढवणे आणि केवळ पात्र लाभार्थ्यांनाच शासकीय धान्याचा लाभ मिळावा, या उद्देशाने ‘मिशन सुधार’ हे अभियान राबवले जात आहे. या अभियानामुळेच नव्या लाभार्थ्यांसाठी मोठी संधी निर्माण झाली आहे.
अपात्र लाभार्थ्यांची नावे वगळली
अभियानांतर्गत जिल्ह्यातील १,३६,२९६ अपात्र सदस्यांची ओळख पटवण्यात आली. त्यापैकी ६२,२४१ सदस्यांची नावे रेशन कार्डमधून वगळण्यात आली आहेत. वगळण्यात आलेल्या नावांमध्ये मृत लाभार्थ्यांचाही समावेश आहे.
शासनाच्या अन्न, नागरी पुरवठा व ग्राहक संरक्षण विभागामार्फत हे अभियान राबवले जात आहे. अपात्र, बोगस आणि दुबार नोंदणी असलेल्या तसेच मृत लाभार्थ्यांची नावे शोधून ती कमी करण्याची प्रक्रिया सुरू आहे. शासनाकडून मिळालेल्या उच्च उत्पन्न गटातील लाभार्थी आणि आयकरदात्यांच्या याद्यांचीही पडताळणी केली जात आहे. जिल्ह्यात ४७,६८५ आयकरदात्यांची यादी मिळाली असून, त्यानुसार संबंधित लाभार्थ्यांची तपासणी सुरू आहे. त्यातील सुमारे २५ हजार आयकरदात्यांची नावे वगळण्यात आली आहेत.
नवीन रेशन कार्डसाठी अर्ज कसा करावा
या अभियानामुळे अपात्र लाभार्थ्यांची नावे कमी होण्याबरोबरच पात्र नागरिकांसाठी रेशनचा लाभ उपलब्ध होण्याचा मार्ग मोकळा झाला आहे. नवीन रेशन कार्ड मिळवण्यासाठी अर्ज केल्यानंतर शिधापत्रिका नोंदणीनंतर साधारणपणे ४५ दिवसांचा कालावधी लागतो. त्यामुळे पात्र लाभार्थ्यांनी आरसीएमएस पोर्टलवर किंवा तहसील कार्यालयात अर्ज करावा, असे जिल्हा पुरवठा अधिकाऱ्यांनी सांगितले आहे.
Leave a Reply