दिवाळीच्या सुट्यांच्या काळात पर्यटकांची वाहने मोठ्या संख्येने रस्त्यावर आल्याने वाकण-पाली-खोपोली राज्य महामार्गावरील वाहतूक व्यवस्था पूर्णपणे विस्कळीत झाली आहे. पाली फाटा ते इमॅजिका या टप्प्यात वाहनांच्या लांबलचक रांगा लागल्या असून, प्रवाशांना तासन्तास खोळंबून राहावे लागत आहे.
रस्त्यावरील गर्दी आणि ठिकठिकाणी पडलेले खड्डे यामुळे अवघे पाचशे मीटर ते एक किलोमीटरचे अंतर पार करण्यासाठी वाहनचालकांना एक ते दीड तास लागत आहे. सुट्यांच्या दिवसांत या मार्गावर वाहनांची संख्या झपाट्याने वाढली असून, कोंडीची समस्या आणखी गंभीर झाली आहे.
महत्त्वाचा जोडरस्ता असूनही कोंडी कायम
वाकण-पाली-खोपोली हा राज्य महामार्ग कोकणाला मुंबई-गोवा महामार्गाशी जोडतो. तसेच विळे-निजामपूर मार्गे माणगावला जाण्यासाठीही हा रस्ता सोयीचा आणि जवळचा मानला जातो. या मार्गावरून मुंबई-पुणे द्रुतगती मार्ग आणि मुंबई-बंगळूर महामार्गावरही सहज पोहोचता येते. त्यामुळे दररोज हजारो प्रवासी आणि वाहनचालक या रस्त्याचा वापर करतात.
चार वर्षांपूर्वी बांधलेल्या रस्त्यावर खड्डे
अवघ्या चार वर्षांपूर्वी सुमारे दोनशे कोटी रुपये खर्च करून हा राज्य महामार्ग तयार करण्यात आला होता. मात्र, काही ठिकाणी खड्डे पडल्याने वाहनांचा वेग मंदावला आहे आणि त्यामुळे कोंडीत मोठी भर पडत आहे. प्रशासनाच्या दुर्लक्षाबद्दल प्रवासी आणि वाहनचालक तीव्र नाराजी व्यक्त करत आहेत.
या महामार्गावरील महत्त्वाचा टप्पा असलेल्या वाकण नाक्यावरही मोठ्या प्रमाणात खड्डे पडले आहेत. मुख्य नाका असल्याने अनेक प्रवासी चहा-पाण्यासाठी आपली वाहने रस्त्याच्या कडेलाच उभी करतात. त्यामुळे आधीच संथ झालेली वाहतूक आणखी मंदावते आणि वाकण नाक्यावरही मोठी कोंडी होते.
शनिवारी, १४ नोव्हेंबर रोजी पाली फाट्यावरही मोठ्या प्रमाणात कोंडी होती. अवघे एक किलोमीटरचे अंतर पार करण्यासाठी दीड तास लागल्याचे प्रवासी अरिफा पठाण यांनी सांगितले. या ठिकाणी वाहतूक सुरळीत ठेवण्यासाठी प्रशासनाने तातडीने योग्य उपाययोजना करणे गरजेचे असल्याचे त्यांनी नमूद केले.
Leave a Reply