नंदुरबार येथील एकलव्य विद्यालयात तब्बल २१ वर्षांपूर्वी दहावी उत्तीर्ण झालेल्या विद्यार्थ्यांचा स्नेहमेळावा उत्साहात पार पडला. दोन दशकांनंतर एकत्र आलेल्या वर्गमित्रांनी शालेय जीवनातील आठवणींना उजाळा दिला. जीवनाच्या विविध क्षेत्रांत स्थायिक झालेल्या या विद्यार्थ्यांनी शाळेतील गुरुजनांनी दिलेल्या संस्कारांमुळेच आपण घडलो, अशी भावना व्यक्त केली.
स्नेहमिलनाच्या अध्यक्षस्थानी पश्चिम खानदेश भिल्ल सेवा मंडळाचे अध्यक्ष डॉ. सुहास नटावदकर होते. नितीन गावित यांनी कार्यक्रमाचे प्रास्ताविक केले. विद्यार्थ्यांनी दहावी उत्तीर्ण झाल्यानंतरचा आपला जीवनप्रवास मांडला. आपल्या मित्रांचा आणि सहकाऱ्यांचा प्रवास ऐकताना विद्यार्थी आणि शिक्षक रंगून गेले होते.
शिक्षकांच्या आठवणींना उजाळा
कार्यक्रमात विद्यार्थ्यांनी आपल्या मनोगतातून शालेय जीवनातील विविध आठवणी जागवल्या. शिक्षकांतर्फे निवृत्त शिक्षक हेमंत खैरनार, विलास वाघ, अशोक पाटील, हारुन कागझी आणि मंगला मोरे यांनी मनोगत व्यक्त केले. विद्यमान शिक्षकांपैकी पर्यवेक्षक टिका पाडवी, भूपेंद्र पाटील, विजया न्हायदे आणि संतोष पाटील यांनीही आपले विचार मांडले.
व्यासपीठावर माजी मुख्याध्यापिका सुहासिनी नटावदकर, विद्यालयाचे मुख्याध्यापक धर्मेंद्र मराठे, निवृत्त शिक्षिका रेखा पाटील, मिलिंद वडनगरे, जकू गावित, जयदीप नटावदकर, डॉ. समिधा नटावदकर आणि रायसिंग वसावे उपस्थित होते. माजी विद्यार्थी आपसिंग वसावे यांनी सूत्रसंचालन केले, तर मयूर पाटील यांनी आभार मानले.
शाळेसाठी योगदानाचे आवाहन
समाजाच्या विविध क्षेत्रांत यशस्वीपणे स्थिरावलेल्या माजी विद्यार्थ्यांना भेटून आनंद द्विगुणित झाल्याचे डॉ. सुहास नटावदकर यांनी सांगितले. शाळा आणि संस्थेच्या विद्यार्थ्यांच्या जीवनात असलेल्या योगदानाची जाणीव ठेवणे ही महत्त्वाची गोष्ट असल्याचे ते म्हणाले. शाळा व संस्थेच्या प्रगतीसाठी या विद्यार्थ्यांनी असेच योगदान देत राहावे, असे आवाहन त्यांनी केले.
कार्यक्रमास जागृती पाटील, डॉ. श्रद्धा वसावे, दीक्षा वसावे, राकेश पाडवी, शैलेंद्र वळवी, विजय बागले, दानियल वळवी, विनोद पाडवी, अर्जुन वळवी, फिरोज जमादार, भूषण पटेल, गोविंद राऊत, जमुना वळवी, भानुप्रिया पाडवी, शैला तडवी, सुनंदा पाडवी, ज्योती तडवी, पंकज पाडवी, फत्तेसिंग पाडवी आणि अफसर खान उपस्थित होते.
Leave a Reply