उत्तर प्रदेशचे माजी मुख्यमंत्री कल्याण सिंह यांचे दोन नातू, राज्यमंत्री संदीप सिंह आणि त्यांचा लहान भाऊ सौरभ सिंह यांचा राजेशाही साखरपुडा थाटात झाला. अलिगड येथे या साखरपुड्यासाठी ५० एकरमध्ये चार महालासारखे महामंडप उभारण्यात आले होते. दीड लाख पाहुण्यांच्या जेवणासाठी १,००० कूक आणि अनेक मदतनीस दिमतीला होते. सध्या उत्तर भारतातील शाही विवाह देशभरात चर्चेत आहेत आणि त्यात या साखरपुड्याची भर पडली आहे.
उत्तर प्रदेश सरकारमधील शिक्षण राज्यमंत्री संदीप सिंह यांचा साखरपुडा मेघना चौधरी यांच्यासोबत झाला. तर त्यांचे लहान भाऊ सौरभ सिंह यांनी अंतरा त्यागी यांच्यासोबत लग्नगाठ बांधण्यापूर्वी साखरपुडा केला. अलिगडमधील तालानगरी भागात या साखरपुड्यासाठी ५० एकरमध्ये चार महालासारखे महामंडप उभारण्यात आले होते. व्हीव्हीआयपी पाहुण्यांसाठी खास व्यवस्था करण्यात आली होती. स्वागतासाठी विशेष व्यवस्था होती आणि त्यांच्यासाठी जेवणात ५० ते ६० प्रकारचे पदार्थ होते.
व्हीव्हीआयपी पाहुण्यांची मोठी गर्दी
व्हीव्हीआयपी पाहुण्यांसाठी मोठी सुरक्षा व्यवस्था ठेवण्यात आली होती. त्यासाठी पोलिसांचा मोठा बंदोबस्त होता आणि सीसीटीव्हीची नजर होती. या साखरपुड्यासाठी मुख्यमंत्री योगी आदित्यनाथ यांच्यासह राज्य मंत्रिमंडळातील मंत्रीच नाही, तर केंद्रातील अनेक बडे नेतेही उपस्थित होते. तसेच अनेक क्षेत्रातील मान्यवरांनीही हजेरी लावली होती.
मुख्य प्रवेशद्वारावर कडक सुरक्षा व्यवस्था करण्यात आली होती. वाहनतळावरही वाहनांची तपासणी करण्यात येत होती. या साखरपुड्यासाठी वैध पास तपासण्यात येत होता. विशेष म्हणजे कल्याण सिंह यांच्या कुटुंबातील व्यक्ती आणि नातेवाईक यांनीसुद्धा सुरक्षा व्यवस्थेतून जात सहकार्य केले.
१००० हून अधिक पोलीस तैनात
व्हीव्हीआयपी प्रोटोकॉलनुसार विविध प्रवेशद्वार आणि एका विशेष मंडपाची व्यवस्था करण्यात आली होती. या कार्यक्रमाच्या सुरक्षेसाठी १,००० हून अधिक पोलीस कर्मचारी तैनात करण्यात आले होते. या संपूर्ण कार्यक्रमात सुरक्षा यंत्रणा अलर्ट होती. प्रत्येक प्रवेशद्वारावर कसून चौकशी आणि पास तपासण्यात येत होता.
दिल्लीत या दोन्ही भावांचे २६ आणि २७ नोव्हेंबर रोजी लग्न होणार आहे.
Leave a Reply