नवी मुंबईत सत्ताधारी पक्षातीलच दोन नेत्यांमधील वाद पुन्हा एकदा उफाळून आला आहे. शहरातील महत्त्वाची कामे रखडल्याचा आरोप करत आमदार मंदा म्हात्रे यांनी वनमंत्री गणेश नाईक यांच्यावर थेट हल्ला चढवला आहे. भाजपच्या आमदाराच्या कामालाच भाजपच्याच मंत्र्याकडून विरोध होत असल्याने नाईक खरोखर भाजपचे आहेत का, असा प्रश्न उपस्थित करत त्यांची डीएनए तपासणी करण्याची मागणी म्हात्रे यांनी केली आहे.
कामांना अडथळा आणल्याचा आरोप
म्हात्रे यांच्या म्हणण्यानुसार, नवी मुंबईकरांच्या गरजेची अनेक कामे त्यांनी आमदार म्हणून मंजूर करून आणली. रुग्णालय, वैद्यकीय महाविद्यालय, ग्रंथालय, मरिना केंद्र आणि क्रीडांगण यांसारख्या प्रकल्पांसाठी सरकारकडून कोट्यवधी रुपयांचा निधीही मिळवला. मात्र ही कामे होऊ नयेत यासाठी नाईक प्रयत्न करत असल्याचा त्यांचा आरोप आहे. शहराला रुग्णालय आणि वैद्यकीय महाविद्यालयाची गरज असून, महाराष्ट्रातील पहिला आणि देशातील दुसरा मरिना प्रकल्पही आपण आणल्याचे म्हात्रे यांनी सांगितले. महाराष्ट्र भवनाचे काम सुरू असून, प्रत्येक कामात अडथळा आणला जात असल्याचे त्यांनी म्हटले आहे. मुख्यमंत्र्यांनी स्वतः आयुक्तांना सूचना दिल्यानंतरही रुग्णालयाचा प्रकल्प रखडल्याचा आरोपही त्यांनी केला.
समर्थकांकडून आरोप फेटाळले
दरम्यान, म्हात्रे यांचे आरोप नाईक यांच्या समर्थक नगरसेवकांनी फेटाळले आहेत. काही तांत्रिक कारणांमुळे कामे मंजूर होण्यास विलंब होत असल्याचे त्यांनी स्पष्ट केले आहे. दुसरीकडे मंत्री उदय सामंत यांनीही नाईक यांच्यावर टीका केली. नाईक हे भाजपचे नेते असून त्यांनी उद्योग विभागाबाबत बोलण्यापेक्षा थेट मुख्यमंत्र्यांशी बोलावे, असे सामंत म्हणाले. नाईक यांच्याकडे वनविभाग असून त्या विभागातील कामांबाबत त्यांनी मुख्यमंत्र्यांना विचारावे, असेही सामंत यांनी सुनावले. नवी मुंबई ते ठाणे या पट्ट्यात शिंदे सेना आणि मंत्री गणेश नाईक यांच्यातील शाब्दिक चकमक नेहमीच रंगत असते. नाईक हे शिंदे यांच्यावर टीका करण्याची संधी सोडत नाहीत. मात्र यावेळी भाजपच्याच आमदाराने त्यांच्यावर टीका केल्याने खळबळ उडाली आहे.
Leave a Reply