जिंतूर तालुक्यात दुष्काळग्रस्त शेतकऱ्यांना दिवाळीपूर्वी प्रत्येकी पाच हजार रुपयांचे अनुदान देण्याची घोषणा शासनाने केली होती. मात्र तालुक्यातील ४० टक्के शेतकऱ्यांच्या खात्यावर ही रक्कम अद्याप जमा झालेली नाही. शासनाने कागदावर दुष्काळ जाहीर केला आणि नुकसानीचे पंचनामेही आटोपले, पण प्रत्यक्ष भरपाई आणि पीकविम्याची रक्कम मिळण्याची प्रतीक्षा अजूनही कायम आहे.
९३ हजार शेतकऱ्यांपैकी किती जणांना मदत मिळाली?
तालुक्यात एकूण ९३ हजार ७२२ शेतकरी आहेत. त्यापैकी ८२ हजार ४ शेतकऱ्यांची पाच हजार रुपयांच्या अनुदानाची ऑनलाइन प्रक्रिया पूर्ण झाली आहे, तर ११ हजार ६८२ शेतकऱ्यांचे अर्ज तांत्रिक कारणांमुळे नाकारण्यात आले आहेत. स्थानिकांच्या माहितीनुसार सुमारे ५७ हजार शेतकऱ्यांच्या खात्यावरच पैसे जमा झाले आहेत; उर्वरित शेतकरी अजूनही मदतीपासून वंचित आहेत. ज्यांचे अनुदान जमा झाले नाही, त्यांनी तहसील कार्यालयात तक्रार करावी, असे प्रशासनाकडून सांगण्यात आले आहे.
खरीप गेले, रब्बीची शाश्वती नाही
खरीप हंगाम हातचा गेला आहे आणि आगामी रब्बी हंगामातील पिकांच्या सिंचनासाठी जलस्त्रोतांत पाणीच नाही. त्यामुळे पुढील हंगामात हाताशी चार पैसे मिळतील का, याची शेतकऱ्यांना खात्री नाही. दिवाळीच्या काळात बाजारपेठांत खरेदीसाठी गर्दी उसळते, पण यंदा दुष्काळाचा फटका बाजारपेठेलाही बसला आहे. शेतकऱ्यांच्या हातात पैसा नसल्याने खरेदीवर मर्यादा आल्या असून ग्रामीण अर्थव्यवस्था मंदावली आहे. गावातील छोट्या-मोठ्या व्यावसायिकांनाही याचा फटका बसला आहे.
भूमिहीन मजुरांसमोर जेवणाचा प्रश्न
दुष्काळाची सर्वांत मोठी झळ भूमिहीन शेतमजूर कुटुंबांना सोसावी लागत आहे. शेतात कामच नसल्याने मजुरांचा प्रश्न बिकट झाला आहे. काम करून रोजची चूल पेटवणाऱ्या कुटुंबांसमोर दोन वेळच्या जेवणाचा प्रश्न उभा आहे. नुकसानग्रस्त शेतकऱ्यांना नुकसानीच्या प्रमाणात भरीव मदत, पीकविम्यातून तातडीची भरपाई आणि कर्जाच्या ओझ्यातून संपूर्ण मुक्ती मिळावी, अशी अपेक्षा व्यक्त होत आहे.
Leave a Reply