मुंबई पोलिस दलातील अनावश्यक शाखा बंद होणार असल्याची जोरदार चर्चा सुरू आहे. गुन्हेगारीचे बदलते स्वरूप आणि गुन्ह्यांची घटलेली संख्या पाहता गुन्हे शाखेची बारा युनिट सोडून अन्य शाखांचा भार कमी केला जाण्याची शक्यता वर्तवण्यात येत आहे.
खंडणीविरोधी पथकाकडून एका गोळीबार प्रकरणाचा तपास काढून घेण्यात आला, हे या चर्चेचे प्रमुख कारण मानले जात आहे. केवळ हाच तपास नाही, तर या पथकाची इतरही कामे गुन्हे शाखेच्या १ ते १२ युनिटकडे देण्यात आली आहेत. समाजसेवा शाखेचेही काही दिवसांपूर्वी पंख छाटण्यात आले आहेत.
खंडणीविरोधी पथकाच्या कामात बदल
खंडणीविरोधी पथक सध्या पोलिस आयुक्तांच्या निशाण्यावर असल्याचे सांगितले जात आहे. गोळीबार प्रकरणाचा तपास काढून घेतल्यानंतर या पथकाकडे असलेले इतरही महत्त्वाच्या गुन्ह्यांचे तपास, तसेच आलेले तक्रार अर्जही काढून घेण्यात आले होते. या पथकाकडील कामकाज गुन्हे शाखेच्या १ ते १२ युनिटकडे घटनेच्या ठिकाणानुसार वाटण्यात आले आहे. त्यामुळे सध्या खंडणीविरोधी पथकाकडे फारसे काम उरले नसल्याचे सांगितले जात आहे.
मुंबईला अंडरवर्ल्डची काळी किनार होती. त्यावेळी गंभीर गुन्हे आणि गुंडांची संख्या मोठी असल्याने मुंबई पोलिस दलात वेगवेगळ्या प्रकारच्या गुन्ह्यांसाठी वेगवेगळ्या शाखा सुरू करण्यात आल्या होत्या. आता गुन्हेगारी बदलली असून गुन्ह्यांची संख्याही आटोक्यात आली आहे.
समाजसेवा शाखेवरही लक्ष
मुंबई पोलिसांच्या समाजसेवा शाखेवर सुरुवातीपासूनच आयुक्तांची नजर आहे. आयुक्तपदाची धुरा सांभाळल्यानंतर घेतलेल्या पहिल्याच गुन्हे परिषदेत या शाखेच्या कामाचा लेखाजोखा मांडताना त्यांनी स्पष्ट शब्दांत सुनावले होते. बार, हुक्कापार्लर आणि जुगाराच्या अड्ड्यांवर छापे टाकणे हेच काम समाजसेवा शाखेचे नाही, तर मानवी तस्करी, बेपत्ता व्यक्तींचा शोध घेणे, देहव्यापाराच्या दलदलीतून महिलांची सुटका आणि बालकामगार शोधणे ही महत्त्वाची कामेही या शाखेची आहेत, असे त्यांनी नमूद केले होते. बार तसेच इतर आस्थापनांवर लक्ष ठेवण्याचे काम स्थानिक पोलिसही करू शकतात, असेही त्यांनी सांगितले होते. तेव्हापासून समाजसेवा शाखेचे पंख छाटण्यात आले आहेत.
मुंबई पोलिसांच्या विविध शाखा
मुंबई गुन्हे शाखेत पोलिस उपायुक्तांच्या कार्यक्षेत्रानुसार बारा युनिट कार्यरत आहेत. ही बारा युनिट वगळता खंडणीविरोधी पथक, मालमत्ता कक्ष, गुन्हे नियंत्रण शाखा, गुन्हेगारी गुप्तवार्ता पथक, समाजसेवा शाखा, अमली पदार्थ विरोधी शाखा आणि महिला अत्याचार प्रतिबंधक शाखा अशा वेगवेगळ्या शाखा आहेत.
९०च्या दशकात मुंबईमध्ये अंडरवर्ल्डच्या कारवाया प्रचंड वाढल्या होत्या. खंडणीसाठी व्यावसायिक आणि अभिनेत्यांना धमकावले जात होते, त्यांच्यावर हल्ले केले जात होते. संघटित टोळ्यांकडून सुरू असलेले हे प्रकार रोखण्यासाठी आणि अशा गंभीर गुन्ह्यांचा तपास करण्यासाठी विशेष शाखा म्हणून खंडणीविरोधी पथकाची स्थापना करण्यात आली. तेव्हापासून व्यावसायिक, अभिनेते, राजकीय नेते आणि बांधकाम व्यावसायिक यांना खंडणीसाठी येणाऱ्या धमक्या, हल्ले तसेच इतर प्रकरणांचा तपास या पथकाकडे दिला जातो.
स्रोत: मूळ बातमी
Leave a Reply