हैदराबाद येथे सुरू असलेल्या भारत समिटमध्ये ३१५ पैकी ११५ वक्त्यांना भारतात प्रवेश नाकारण्यात आला. केंद्रीय गृहमंत्रालयाच्या निर्देशानुसार त्यांचे व्हिसाही रद्द करण्यात आल्याचा आरोप करत काँग्रेस खासदार शशी थरूर यांनी शुक्रवारी केंद्र सरकारला धारेवर धरले. या निर्णयाच्या कायदेशीर वैधतेवरही त्यांनी समाजमाध्यमावरील पोस्टमधून प्रश्नचिन्ह उपस्थित केले.
परराष्ट्र व्यवहार मंत्रालयाने या परिषदेसाठी परवानगी दिलेल्या ३१५ पैकी ११५ वक्त्यांना भारतात प्रवेश नाकारला तसेच त्यांचा व्हिसाही रद्द करण्यात आला, हे मला हैदराबादेत आल्यावर समजले, असे थरूर यांनी पोस्टमध्ये म्हटले आहे. सरकारने कोणत्या कायदेशीर तरतुदीच्या आधारे हे कठोर पाऊल उचलले, हे पूर्णपणे अस्पष्ट असल्याचे त्यांनी नमूद केले. या परिषदेचा उद्या समारोप होत असल्याने हा निर्णय मागे घेणे आता अशक्य असल्याचेही त्यांनी म्हटले आहे.
लोकशाहीसाठी लज्जास्पद असल्याची टीका
अभिमानास्पद लोकशाही असलेला देश इतका असुरक्षित झाला आहे की, आपल्यावर टीका करतील अशी भीती वाटणारे आवाज दाबण्याची वेळ त्याच्यावर आली आहे, ही खेदजनक बाब असल्याचे थरूर यांनी म्हटले आहे. या परिषदेच्या दृष्टीने ही निराशाजनक घटना असल्याचे सांगत वक्त्यांना रोखण्याच्या सरकारच्या निर्णयावर त्यांनी चिंता व्यक्त केली.
परिषदेत सुमारे ७० देशांचे प्रतिनिधी
दरम्यान, थरूर यांनी उद्घाटनाच्या दिवशी या परिषदेला हजेरी लावली. भारतासह जवळपास ७० देशांतील एक हजार प्रतिनिधी या दोन दिवसीय परिषदेत सहभागी झाले आहेत. उदयोन्मुख जागतिक व्यवस्था, त्याबाबत भारताची धोरणात्मक भूमिका, सहकारी संघराज्यवाद आणि निवडणुकांची निष्पक्षता या विषयांवर परिषदेत चर्चा होत आहे.
स्रोत: मूळ बातमी
Leave a Reply