येवला : जिल्ह्यातील धरणांमध्ये पुरेसे पाणी असतानाही रब्बी हंगामातील पिके पाण्याअभावी हातातून जाण्याची भीती निर्माण झाली आहे. तालुक्यात पावसाअभावी दुष्काळसदृश परिस्थिती असून उभी पिके वाचवण्यासाठी तातडीने पाण्याची गरज आहे. या पार्श्वभूमीवर पालखेड डाव्या कालव्यातून शेतीसाठी दोन आवर्तने सोडण्यात यावीत, या मागणीसाठी कृषी उत्पन्न बाजार समितीत शेतकरी आणि सर्वपक्षीय पदाधिकाऱ्यांची महत्त्वपूर्ण बैठक झाली. बैठकीत शेकडो शेतकरी उपस्थित होते.
पालकमंत्र्यांशी दूरध्वनीवरून संवाद
बैठकीदरम्यान शिवसेना शिंदे गटाचे तालुकाप्रमुख पांडुरंग शेळके यांनी पालकमंत्री गिरीश महाजन यांच्याशी दूरध्वनीवरून संपर्क साधला आणि उपस्थित शेतकऱ्यांशी त्यांचा थेट संवाद घडवून आणला. मंत्री महाजन यांनी १० डिसेंबरला आवर्तन सोडण्यात येईल, अशी माहिती दिली. मात्र शेतकरी संघटनेचे नेते संतू पाटील झांबरे यांनी इतक्या उशिरा पाणी मिळाल्यास पिकांची राखरांगोळी होईल, असे सांगत लवकर आवर्तन देण्याची मागणी केली. येत्या दोन दिवसांत शेतकऱ्यांचे शिष्टमंडळ घेऊन नाशिक येथे भेटण्याची सूचना मंत्री महाजन यांनी दिली.
पाणीसाठा पुरेसा; आंदोलनाचा इशारा
धरणात आजही ९२ टक्के पाणीसाठा असून पिण्याच्या पाण्यासाठी पाणी राखीव ठेवूनही शेतीसाठी दोन आवर्तने देणे शक्य असल्याचे बैठकीत सांगण्यात आले. शेतकऱ्यांमध्ये पाण्यावरून प्रचंड संताप असून प्रसंगी आंदोलनही करण्याची तयारी असल्याचे झांबरे यांनी स्पष्ट केले. शेतकऱ्यांच्या हितासाठी पक्षीय मतभेद बाजूला ठेवून सर्वांनी एकत्र येण्याचे आवाहनही त्यांनी केले. पालकमंत्री महाजन यांच्यासोबत होणाऱ्या बैठकीत पाणी सोडण्याबाबत काय निर्णय होतो, त्यानंतर पुढील आंदोलनाची दिशा ठरवण्यात येणार आहे. बैठकीला काँग्रेसचे तालुकाध्यक्ष समीर देशमुख यांच्यासह अनेक पदाधिकारी आणि शेतकरी उपस्थित होते.
स्रोत: मूळ बातमी
Leave a Reply