बँकिंग क्षेत्रात करिअर करू इच्छिणाऱ्या पदवीधरांसाठी महत्त्वाची संधी आली आहे. इंडियन बँकेने आर्थिक वर्ष २०२६-२७ साठी देशभरात एकूण १५०० अप्रेंटिस पदांच्या भरतीची अधिसूचना जाहीर केली आहे. अर्ज प्रक्रिया सुरू झाली असून इच्छुक उमेदवार ऑनलाइन पद्धतीने अर्ज करू शकतात. या भरतीत महाराष्ट्रासाठी ७० पदे उपलब्ध आहेत.
राज्यनिहाय पदे किती?
ही भरती अप्रेंटिसशिप कायदा १९६१ अंतर्गत होत असून देशातील ३० राज्ये आणि केंद्रशासित प्रदेशांमध्ये पदे उपलब्ध आहेत. उत्तर प्रदेशात सर्वाधिक २८५, तामिळनाडूमध्ये २७०, पश्चिम बंगालमध्ये १४५, आंध्र प्रदेशात ८५, बिहारमध्ये ८०, महाराष्ट्रात ७०, मध्य प्रदेशात ६५ आणि झारखंडमध्ये ६० पदे आहेत.
पात्रता आणि विद्यावेतन
या भरतीसाठी उमेदवाराकडे कोणत्याही मान्यताप्राप्त विद्यापीठाची पदवी असणे आवश्यक आहे. ही पदवी १ एप्रिल २०२२ ते १ नोव्हेंबर २०२६ या कालावधीत पूर्ण केलेली असावी आणि निकाल १ नोव्हेंबर २०२६ किंवा त्यापूर्वी जाहीर झालेला असावा. १ नोव्हेंबर २०२६ रोजी उमेदवाराचे वय २० ते २८ वर्षांच्या दरम्यान असावे. राखीव प्रवर्गातील उमेदवारांना नियमानुसार वयोमर्यादेत सवलत मिळेल.
निवड झालेल्या उमेदवारांना बारा महिन्यांचे ऑन-द-जॉब प्रशिक्षण दिले जाईल. या कालावधीत मेट्रो आणि शहरी भागातील शाखांमध्ये प्रशिक्षण घेणाऱ्यांना दरमहा १५ हजार रुपये, तर ग्रामीण आणि निमशहरी भागातील शाखांमध्ये प्रशिक्षण घेणाऱ्यांना दरमहा १२ हजार ३०० रुपये विद्यावेतन मिळेल.
अर्ज कसा करायचा?
अर्ज प्रक्रिया ५ नोव्हेंबर २०२६ पासून सुरू झाली आहे. इच्छुक उमेदवार २५ नोव्हेंबर २०२६ पर्यंत ऑनलाइन अर्ज करू शकतील. अर्ज आणि शुल्क भरण्याची अंतिम तारीखही २५ नोव्हेंबरच आहे.
अर्ज करू इच्छिणाऱ्या उमेदवारांनी सर्वप्रथम NATS 2.0 पोर्टलवर जाऊन आपली प्रोफाइल पूर्ण करावी आणि एनरोलमेंट आयडी मिळवावा. त्यानंतर इंडियन बँकेच्या अधिकृत संकेतस्थळ indianbank.bank.in ला भेट द्यावी. संकेतस्थळावरील करिअर विभागात जाऊन ‘Engagement of Apprentices in Indian Bank 2026’ या दुव्यावर क्लिक करून नोंदणी करावी. अर्जात वैयक्तिक, शैक्षणिक तसेच राज्य आणि जिल्ह्याबाबतची माहिती भरून आवश्यक कागदपत्रे अपलोड करावीत. त्यानंतर ऑनलाइन अर्ज शुल्क भरून अर्ज सादर करावा आणि भविष्यातील संदर्भासाठी अर्जाची छापील प्रत काढून ठेवावी.
स्रोत: मूळ बातमी
Leave a Reply