ग्रामीण भागातील प्रत्येक घराला नळाद्वारे शुद्ध पाणी मिळावे, यासाठी सुरू असलेल्या जलजीवन मिशनच्या कामांमध्ये सोलापूर जिल्ह्यात मोठी तफावत दिसून येत आहे. तालुकानिहाय प्रगतीत माळशिरस तालुका आघाडीवर असून, उत्तर सोलापूर तालुका सर्वात पिछाडीवर राहिला आहे. जिल्ह्यातील ११ तालुक्यांमधील १ हजार ३२९ योजनांपैकी केवळ ७४७ योजना पूर्ण झाल्या असून, अद्याप ५८२ योजनांची कामे अपूर्ण आहेत.
कोणता तालुका कुठे
जिल्ह्यात आतापर्यंत सुमारे ५६ टक्के कामे मार्गी लागली आहेत. माळशिरस तालुक्याने सर्वाधिक १२४ योजना पूर्ण करत जिल्ह्यात अव्वल स्थान पटकावले आहे. त्याखालोखाल बार्शी (९५), सांगोला (८८) आणि मंगळवेढा (७५) या तालुक्यांनी कामांत चांगली गती राखली आहे. दुसरीकडे, सोलापूर शहरालगतच्या तालुक्यांमध्ये कामांचा वेग अत्यंत मंदावला आहे. उत्तर सोलापूर तालुक्यात मंजूर ४० योजनांपैकी अवघ्या १३ योजनांचीच कामे पूर्ण होऊ शकली आहेत. दक्षिण सोलापूर तालुक्याची स्थितीही फारशी समाधानकारक नसून, तेथील ९४ पैकी केवळ ४१ योजना पूर्ण झाल्या आहेत.
अपूर्ण योजनांची स्थिती
अपूर्ण असलेल्या ५८२ योजनांपैकी २ योजना अद्याप सुरूच झालेल्या नाहीत. ६७ योजना ० ते २५ टक्के, ९६ योजना २५ ते ५० टक्के, २०७ योजना ५० ते ७५ टक्के आणि २१० योजना ७५ ते १०० टक्के पूर्ण आहेत. जिल्ह्यात पाणीटंचाईचे सावट असतानाही निधीअभावी या योजना रखडल्याचे पालकमंत्री, जिल्हाधिकारी आणि मुख्य कार्यकारी अधिकाऱ्यांकडून सांगण्यात येत आहे. कामांच्या या संथगतीमुळे योजना पूर्ण होऊन प्रत्यक्ष नळाला पाणी येण्यासाठी ग्रामीण भागातील नागरिकांना आणखी प्रतीक्षा करावी लागणार आहे.
स्रोत: मूळ बातमी
Leave a Reply