विवोचा १२००० एमएएच बॅटरीचा स्मार्टफोन येणार?

स्मार्टफोनची बॅटरी लवकर संपणे ही अनेक वापरकर्त्यांची रोजची तक्रार आहे. ही समस्या दूर करण्यासाठी विवो १२००० एमएएच क्षमतेची बॅटरी असलेला नवा स्मार्टफोन आणण्याच्या तयारीत आहे.

मिळालेल्या माहितीनुसार या बॅटरीचे मोठ्या प्रमाणावर उत्पादन सुरू झाले आहे. तिची रेटेड क्षमता ११९७० एमएएच असल्याचे सांगितले जाते. त्यामुळे ही बॅटरी १२००० एमएएच क्षमतेची मानली जात आहे. मात्र ही बॅटरी कोणत्या स्मार्टफोनमध्ये वापरली जाईल, हे अद्याप स्पष्ट झालेले नाही. फोनच्या लॉन्चबाबत किंवा इतर वैशिष्ट्यांबाबतही कोणतीही माहिती समोर आलेली नाही.

लीकमध्ये ‘ब्लू ब्रँड’चा उल्लेख

या लीकमध्ये थेट कंपनीचे नाव नाही; त्याऐवजी ‘ब्लू ब्रँड’चा उल्लेख आहे, ज्याचा संबंध विवोशी जोडला जात आहे. ही माहिती अचूक ठरल्यास, ही विवोच्या स्मार्टफोनमधील आतापर्यंतची सर्वात मोठी बॅटरी ठरू शकते.

मोठ्या बॅटरीची स्पर्धा

कॅमेरा, प्रोसेसर आणि डिस्प्लेसोबतच बॅटरी हे आता स्मार्टफोनचे प्रमुख वैशिष्ट्य बनले आहे. कंपन्या आता स्वतःला ५००० किंवा ६००० एमएएचपुरते मर्यादित ठेवू इच्छित नाहीत. अलीकडेच १०००० एमएएच बॅटरीचे फोन बाजारात आले आहेत. विवो एस२ एफईमध्ये १०००० एमएएच, ऑनर पॉवर २ मध्ये १००८० एमएएच आणि रिअलमी पी४ पॉवरमध्ये १०००१ एमएएच बॅटरी आहे. ओप्पोही १२००० एमएएच बॅटरीच्या फोनवर काम करत आहे. विवो मोठ्या डिस्प्लेच्या आगामी फोनसाठी यापेक्षाही मोठ्या क्षमतेच्या बॅटरीची चाचणी करत असून पुढील वर्षी येणाऱ्या फोल्डेबल फोनवरही काम सुरू आहे.

स्रोत: मूळ बातमी