PF पगारातून कापला जातोय, पण खात्यात जमा होत नाही? तपासा असा

नोकरी करणाऱ्या कर्मचाऱ्यांच्या पगारातून दर महिन्याला भविष्य निर्वाह निधीची रक्कम कापली जाते. मात्र, पगारातून पीएफ कापला गेला म्हणजे ती रक्कम कर्मचारी भविष्य निर्वाह निधी संघटनेकडे जमा झालीच असे नाही. काही कंपन्या कर्मचाऱ्यांच्या पगारातून पीएफ कापतात, पण ती रक्कम EPFO कडे जमा करत नाहीत. त्यामुळे कर्मचाऱ्यांच्या निवृत्तीनंतरच्या बचतीवर परिणाम होऊ शकतो.

त्यामुळे केवळ पगारपत्रकावर अवलंबून न राहता वेळोवेळी पीएफ पासबुक तपासणे महत्त्वाचे आहे. कंपनीकडून पीएफ नियमित जमा होतो आहे की नाही, हे घरबसल्या ऑनलाइन तपासता येते.

कंपनीला PF कधीपर्यंत जमा करावा लागतो?

नियमानुसार कंपन्यांना मागील महिन्याचा पीएफ पुढील महिन्याच्या १५ तारखेपर्यंत जमा करणे बंधनकारक आहे. यामध्ये कर्मचारी आणि कंपनी या दोघांचेही योगदान समाविष्ट असते. उदाहरणार्थ, ऑक्टोबर महिन्याच्या पगारातून पीएफ कापला असेल, तर कंपनीने तो १५ नोव्हेंबरपर्यंत EPFO कडे जमा करणे आवश्यक आहे.

PF खात्यात पैसे जमा झाले की नाही, असे तपासा

१. सर्वप्रथम EPFO च्या मेंबर पासबुक पोर्टलला भेट द्या.
२. तुमचा UAN क्रमांक आणि पासवर्ड टाकून लॉगिन करा.
३. तुमच्या सध्याच्या कंपनीची Member ID निवडा.
४. पीएफ पासबुक उघडून प्रत्येक महिन्याची जमा रक्कम तपासा.
५. कर्मचारी आणि कंपनी या दोघांचेही योगदान जमा झाले आहे का, हे पाहा.

रक्कम जमा न झाल्यास काय करावे?

पगारातून पीएफ कापला जात असेल, पण पासबुकमध्ये रक्कम दिसत नसेल, तर सर्वप्रथम कंपनीच्या एचआर किंवा पेरोल विभागाशी संपर्क साधा. संबंधित महिन्याचा पीएफ जमा केला आहे का आणि ईसीआर भरला आहे का, याची माहिती मागा.

स्रोत: मूळ बातमी