कोरोना व्हायरसने पुन्हा एकदा जगाचे लक्ष वेधले आहे. कोविड-१९ चा नवा व्हेरिएंट पीजे.२.१ अनेक देशांमध्ये आढळून आला आहे. मे २०२६ मध्ये कॅनडातील ओंटारियो येथे या व्हेरिएंटची पहिल्यांदा ओळख झाली. त्यानंतर अमेरिका, युरोप, ऑस्ट्रेलिया, न्यूझीलंड आणि आशियातील काही देशांमध्येही त्याचा प्रसार झाला आहे. या व्हेरिएंटच्या स्पाइक प्रोटीनमध्ये अनेक बदल आढळल्याने शास्त्रज्ञ त्याचा अभ्यास करत आहेत. मात्र हा व्हेरिएंट अधिक गंभीर आजार निर्माण करतो किंवा मृत्यूचा धोका वाढवतो, असे अद्याप सिद्ध झालेले नाही. भारतातही सध्या या व्हेरिएंटची पुष्टी झालेली नाही.
पीजे.२.१ हा सार्स-कोव्ह-२ या कोरोना विषाणूचाच एक नवा प्रकार आहे. त्याच्या स्पाइक प्रोटीनमध्ये अनेक म्युटेशन आढळले आहेत. हे प्रोटीन विषाणूला मानवी पेशींमध्ये प्रवेश करण्यास मदत करते. सुरुवातीच्या संशोधनानुसार या व्हेरिएंटमध्ये मानवी पेशींशी जोडले जाण्याची क्षमता अधिक असण्याची शक्यता आहे. मात्र याबाबत अधिक संशोधनाची गरज असून ते सुरू आहे.
लक्षणे कोणती?
या नव्या व्हेरिएंटची वेगळी ओळख सांगणारी विशिष्ट लक्षणे अद्याप समोर आलेली नाहीत. ताप, थंडी वाजणे, खोकला, घसा दुखणे, नाक वाहणे किंवा बंद होणे, डोकेदुखी, अंगदुखी आणि थकवा ही सामान्य लक्षणे दिसू शकतात. काही रुग्णांना श्वास घेण्यास त्रास किंवा चव आणि वास ओळखण्याच्या क्षमतेत बदल जाणवू शकतो.
जागतिक आरोग्य संघटनेनुसार कोविड आणि इन्फ्लुएंझाची अनेक लक्षणे सारखी असतात. त्यामुळे केवळ लक्षणांवरून आजाराचे निदान करणे कठीण आहे. सध्या पीजे.२.१ मुळे रुग्णालयात दाखल होण्याचे किंवा मृत्यूचे प्रमाण वाढल्याचा ठोस पुरावा नाही. त्यामुळे घाबरण्याचे कारण नसले तरी आरोग्याची काळजी घेणे महत्त्वाचे आहे.
बचावासाठी काय करावे
गर्दीच्या ठिकाणी आणि हवा खेळती नसलेल्या बंद जागांमध्ये मास्कचा वापर करावा. घरातील तसेच कार्यालयातील खिडक्या उघड्या ठेवून हवा खेळती राहील याची काळजी घ्यावी. नियमितपणे साबणाने हात धुवावेत किंवा सॅनिटायझरचा वापर करावा. ताप, सतत खोकला, घशात खवखव किंवा सर्दीसारखी लक्षणे जाणवल्यास त्याकडे दुर्लक्ष करू नये. लक्षणे दोन दिवसांपेक्षा जास्त काळ कायम राहिल्यास डॉक्टरांच्या सल्ल्याने कोविड चाचणी करून घ्यावी. आजारी असल्यास घरातच थांबावे आणि ज्येष्ठ नागरिक किंवा कमी रोगप्रतिकारशक्ती असलेल्या व्यक्तींच्या संपर्कात येणे टाळावे. तापासोबत श्वास घेण्यास त्रास होत असल्यास किंवा ऑक्सिजनची पातळी कमी झाल्यास तातडीने डॉक्टरांचा सल्ला घ्यावा.
स्रोत: मूळ बातमी
Leave a Reply