दिवाळीत वसई-विरारमध्ये २५ ते ३० आगी; पीव्हीसी पाईप भस्मसात

दिवाळीचा आनंद साजरा होत असतानाच वसई-विरार शहरात आगीच्या घटनांनी चिंता वाढवली आहे. गेल्या दोन दिवसांत शहरात छोट्या-मोठ्या मिळून तब्बल २५ ते ३० ठिकाणी आग लागल्याची माहिती समोर आली आहे. या घटनांमुळे सणाच्या काळात नागरिकांमध्ये भीतीचे वातावरण निर्माण झाले आहे.

वसई पूर्वेत पीव्हीसी पाईपला भीषण आग

वसई पूर्व येथे वाहतूक पोलिसांच्या गोदामाशेजारील स्मशानभूमीजवळ महापालिकेच्या जागेवर टाकून ठेवलेल्या पीव्हीसी पाईपलाईनला दुपारी चार ते सव्वाचारच्या सुमारास भीषण आग लागली. आगीमुळे परिसरात काळ्या धुराचे लोट पसरले होते, जे शहराच्या अनेक भागांतून दिसत होते. माहिती मिळताच अग्निशमन अधिकारी विशाल शिर्के यांनी पथकासह घटनास्थळी धाव घेतली आणि आगीवर नियंत्रण मिळवले. कंत्राटदाराचे काम पूर्ण होऊनही जुने पीव्हीसी पाईप महापालिकेच्या जागेवरच टाकून ठेवण्यात आले होते. वाढती उष्णता, सुकलेले गवत आणि फटाके किंवा रॉकेटची ठिणगी पडल्याने ही आग भडकल्याचा प्राथमिक अंदाज वर्तवण्यात आला आहे.

प्रशासनाच्या कारभारावर संताप

या घटनेनंतर भाजप नगरसेवक विशाल जाधव यांनी महापालिका आणि पोलिसांच्या ढिसाळ कारभारावर तीव्र संताप व्यक्त केला. महापालिकेच्या जागेत कंत्राटदाराचा माल ठेवण्याबाबत गटनेते अशोक शेळके यांनी तीन-चार दिवसांपूर्वीच तक्रार केली होती. महासभेतही रस्त्यावरील पाईप आणि बेवारस वाहनांचा मुद्दा उपस्थित केला होता. मात्र, निवडून आलेल्या लोकप्रतिनिधींच्या तक्रारींची दखल अधिकारी घेत नसल्याचा आरोप जाधव यांनी केला. आचोळे पोलिस ठाण्याबाहेर जप्त केलेल्या गाड्या आणि रस्त्यावर उभ्या असलेल्या महापालिकेच्या कचरा गाड्यांजवळ गर्दुल्ल्यांचा वावर वाढल्याने आगीचे प्रकार घडत असल्याचेही त्यांनी सांगितले. सकाळी अकराच्या सुमारास वीणा डायनेस्टीबाहेर एका गाडीला, तर इम्पेरियल इमारतीजवळही आगीची घटना घडली.

मोकळ्या मैदानातच फटाके फोडा

वाढत्या आगीच्या घटनांच्या पार्श्वभूमीवर नागरिकांनी २१ मजली इमारतींच्या आवारात उंच जाणारे फॅन्सी शॉट्स किंवा रॉकेट न फोडता मोकळ्या मैदानातच फटाके फोडावेत, असे आवाहन अग्निशमन अधिकारी विशाल शिर्के व नगरसेवक विशाल जाधव यांनी केले आहे. ऑक्टोबर-नोव्हेंबरच्या उष्णतेमुळे सर्वत्र गवत सुकलेले असून, नागरिकांनी गर्दीच्या व इमारतींच्या परिसरात फटाके न फोडता मोकळ्या मैदानातच सुरक्षितपणे फटाके फोडावेत, जेणेकरून इतरांची दिवाळी खराब होणार नाही आणि जीवितहानी टळेल.

स्रोत: मूळ बातमी