कॅन्सरच्या उपचारासाठी औषधांवर होणारा खर्च कमी करण्याच्या दृष्टीने केंद्र सरकारने महत्त्वाचा निर्णय घेतला आहे. कॅन्सरवरील औषधांच्या १,३६४ फॉर्म्युलेशन्सच्या सुधारित किरकोळ किमती लागू करण्यात आल्या आहेत. तसेच, १३७ कॅन्सरविरोधी औषधांच्या ट्रेड मार्जिनवर मर्यादा निश्चित करण्यात आली आहे. या निर्णयामुळे रुग्णांना दरवर्षी सुमारे ३,५४०.३८ कोटी रुपयांची बचत होण्याची अपेक्षा व्यक्त करण्यात आली आहे.
केंद्रीय रसायन आणि खते मंत्रालयाच्या अखत्यारीतील राष्ट्रीय औषध मूल्यनिर्धारण प्राधिकरणाने १३७ कॅन्सरविरोधी औषधांच्या कमाल किरकोळ किमतीवरील ट्रेड मार्जिनची मर्यादा निश्चित केली आहे. आरोग्य सेवा महासंचालनालयाने १७ ऑक्टोबर २०२६ रोजी स्थापन केलेल्या तज्ज्ञ समितीच्या शिफारशींच्या आधारे हा निर्णय घेण्यात आला.
६७९ ब्रँडच्या किमती ५० टक्क्यांहून अधिक घटल्या
मंत्रालयाने दिलेल्या माहितीनुसार, ८ नोव्हेंबरपर्यंत ८५ औषध कंपन्यांनी १२१ औषधांशी संबंधित १,३६४ कॅन्सरविरोधी फॉर्म्युलेशन्सच्या सुधारित कमाल किरकोळ किमतींची माहिती सादर केली होती. यापैकी ६७९ ब्रँडच्या किमतींमध्ये ५० टक्क्यांपेक्षा अधिक कपात झाली आहे. तर काही औषधांच्या कमाल किरकोळ किमतीत सर्वाधिक ९६.४५ टक्क्यांपर्यंत घट नोंदवण्यात आली आहे.
या सर्व औषधांच्या सुधारित किमती ९ नोव्हेंबरपासून लागू झाल्या आहेत. त्यामुळे कॅन्सरच्या उपचारांसाठी औषधे खरेदी करणाऱ्या रुग्णांना आर्थिक दिलासा मिळण्याची अपेक्षा आहे.
किमतींची पडताळणी कशी कराल?
ग्राहकांना औषधांच्या पाकिटावर छापलेली सुधारित कमाल किरकोळ किंमत तपासता येणार आहे. तसेच ‘फार्मा सही दाम’ या मोबाइल ॲपद्वारे किंवा राष्ट्रीय औषध मूल्यनिर्धारण प्राधिकरणाच्या अधिकृत संकेतस्थळावर औषधांच्या किमतींची पडताळणी करता येईल.
महत्त्वाचे म्हणजे, कोणताही औषध विक्रेता किंवा रुग्णालयातील औषध दुकान सुधारित कमाल किरकोळ किमतीपेक्षा अधिक पैसे आकारू शकणार नाही. त्यामुळे औषध खरेदी करताना ग्राहकांनी पाकिटावरील सुधारित किंमत तपासावी, असे आवाहन करण्यात आले आहे.
स्रोत: मूळ बातमी
Leave a Reply