रविवारी लक्ष्मीपूजनाच्या दिवशी ठाणे शहरात एका बहुमजली इमारतीला लागलेल्या भीषण आगीने मोठी खळबळ उडाली. वागळे इस्टेट परिसरातील रहेजा गार्डन संकुलातील कार्लाइन या सतरा मजली इमारतीला रात्री साडेआठच्या सुमारास आग लागली. नवव्या मजल्यावर सुरू झालेली आग काही वेळातच वरच्या मजल्यांपर्यंत पसरली. सुदैवाने या घटनेत कोणाचीही जीवितहानी झाली नाही, मात्र मालमत्तेचे मोठे नुकसान झाले आहे.
राज्यात दिवाळीच्या काळात फटाक्यांमुळे आगीच्या अनेक घटना घडल्या. ठाण्यातही शहराच्या वेगवेगळ्या भागांत आगी लागल्याच्या घटना समोर आल्या. त्यात वागळे इस्टेटमधील ही घटना सर्वांत गंभीर ठरली. आगीची माहिती मिळताच ठाणे आणि मुंबई परिसरातील अग्निशमन दलाच्या दहा ते पंधरा गाड्या घटनास्थळी दाखल झाल्या. जवानांनी सहा तास अथक प्रयत्न करून आगीवर नियंत्रण मिळवले. बचावकार्यात पन्नासहून अधिक रहिवासी आणि पाळीव प्राण्यांना सुखरूप बाहेर काढण्यात आले. या घटनेत काही जणांना दुखापत झाली असून त्यांच्यावर उपचार सुरू आहेत.
अंधारात बॅटरी घेऊन शिंदे इमारतीत
आगीची माहिती मिळताच उपमुख्यमंत्री एकनाथ शिंदे रात्री घटनास्थळी पोहोचले. सुरक्षिततेच्या कारणामुळे अग्निशमन दलाने परिसरातील वीजपुरवठा खंडित केला होता. त्यामुळे इमारतीत अंधार पसरला होता. तरीही शिंदे यांनी हातात मोठी बॅटरी घेऊन इमारतीत प्रवेश केला. ते थेट इमारतीच्या पार्किंगमध्ये गेले. तिथे उभ्या असलेल्या अग्निशमन दलाच्या जवानांकडून त्यांनी आग कशी लागली आणि बचावकार्य कसे सुरू आहे, याची माहिती घेतली.
बचावकार्यादरम्यान वरच्या मजल्यावर एक जण अडकल्याचे जवानांनी त्यांना सांगितले. त्यावर शिंदे यांनी तो तरुण आहे का, अशी विचारणा केली. जवानांनी त्या तरुणाला व्हीलचेअरवरून खाली आणले जात असल्याचे सांगितले. इमारतीत धूर आहे का आणि बचाव पथक वर पोहोचले का, असे प्रश्नही त्यांनी विचारले.
ठाण्यात रॉकेट आणि हवेत उडणाऱ्या फटक्यांवर बंदी
या घटनेनंतर ठाणे जिल्हाधिकारी श्रीकृष्ण पांचाळ यांनी महत्त्वाचा निर्णय घेतला. ठाण्यात रॉकेट आणि हवेत उडणाऱ्या फटाक्यांवर बंदी घालण्यात आली आहे. फटाके केवळ खुल्या मैदानात फोडावेत, असे आदेशही देण्यात आले आहेत. दिवाळीच्या काळात अशा घटना पुन्हा घडू नयेत, यासाठी हा निर्णय घेण्यात आल्याचे सांगण्यात आले.
स्रोत: मूळ बातमी
Leave a Reply