मनोरंजन विश्वात नाव, पैसा आणि प्रसिद्धी मिळाल्यानंतर अनेक कलाकारांचे राहणीमान बदलते. मात्र, काही कलाकार असे असतात जे यशाच्या शिखरावर पोहोचल्यानंतरही आपला साधेपणा आणि माणुसकी जपतात. अशाच एका लोकप्रिय अभिनेत्याचा फोटो सध्या सोशल मीडियावर चर्चेचा विषय ठरला आहे. हा अभिनेता दुसरा तिसरा कोणी नसून ‘द ग्रेट इंडियन कपिल शो’मधून प्रसिद्ध झालेला सुनील ग्रोव्हर आहे. दिवाळीच्या निमित्ताने सुनीलने रस्त्याच्या कडेला बसून फुले आणि कंदील विकतानाचा फोटो शेअर केला आहे. त्याचा हा फोटो पाहून चाहतेही आश्चर्यचकित झाले आहेत.
सुनील ग्रोव्हरने नुकताच आपल्या इन्स्टाग्राम अकाउंटवर एक फोटो शेअर केला आहे. या फोटोमध्ये तो रस्त्याच्या कडेला जमिनीवर बसलेला दिसत आहे. त्याच्या समोर फुलांचा मोठा ढीग असून, हातात दिवाळीसाठी लागणारी फुले आणि सजावटीच्या वस्तू दिसत आहेत. विशेष म्हणजे, तो रस्त्यावर फुले विकणाऱ्या काही मुलींसोबतही बसलेला पाहायला मिळत आहे. यावेळी सुनीलने शॉर्ट्स आणि साधा टी-शर्ट परिधान केला आहे. त्याच्या या साध्या अंदाजाने चाहत्यांचे लक्ष वेधून घेतले आहे. फोटो शेअर करताना त्याने ‘सर्वांना दिवाळीच्या शुभेच्छा. तुमच्या आयुष्यात प्रेम आणि प्रकाशाचे आगमन होवो,’ असे कॅप्शन दिले आहे.
खरंच फुले विकतोय का सुनील ग्रोव्हर?
सुनील ग्रोव्हरने खरोखरच फुले विकण्याचा व्यवसाय सुरू केला आहे का, असा प्रश्न अनेकांना पडला आहे. मात्र, प्रत्यक्षात तसे नाही. दिवाळीनिमित्त रस्त्याच्या कडेला फुले विकणाऱ्या विक्रेत्यांसोबत बसून त्याने हा फोटो काढला आहे. सुनील आपल्या विनोदी स्वभावासोबतच साधेपणासाठीही ओळखला जातो. तो अनेकदा अशाच हटके अंदाजातील फोटो आणि व्हिडिओ चाहत्यांसोबत शेअर करत असतो.
याआधीही असे व्हिडिओ
याआधीही सुनीलने असे अनेक मजेशीर व्हिडिओ शेअर केले आहेत. जून महिन्यात त्याने नदीकाठी सामान्य लोकांसारखं चादरीवर झोपतानाचा व्हिडिओ शेअर केला होता. तर एका व्हिडिओमध्ये तो म्हशींना अंघोळ घालताना दिसला होता. एवढेच नाही तर रस्त्याच्या कडेला बसून स्वतःच्या पँटला इस्त्री करतानाचा आणि कांदे विकतानाचाही त्याचा व्हिडिओ व्हायरल झाला होता.
स्रोत: मूळ बातमी
Leave a Reply