पश्चिम आफ्रिकेत मन हेलावून टाकणारी घटना घडली. समुद्रामध्ये प्रवासी बोट बुडून २१ जणांचा मृत्यू झाला. स्थलांतरितांना घेऊन जाणारी ही बोट स्पेनच्या कॅनरी बेटांकडे जात असताना ही घटना घडली. बोटीमध्ये मोठ्या संख्येने प्रवासी प्रवास करत होते. या घटनेमध्ये आतापर्यंत २१ जणांचा मृत्यू झाला, तर एकाचे प्राण वाचवण्यात यश आले. अनेक जण बेपत्ता झाले असून त्यांचा शोध घेतला जात आहे.
सेनेगलच्या गृह मंत्रालयाने दिलेल्या माहितीनुसार, राजधानी डकारपासून उत्तरेला सुमारे १८० किलोमीटर अंतरावर असलेल्या केबेमेरजवळ समुद्रात प्रवासी बोट उलटली. शनिवार संध्याकाळपर्यंत २१ जणांचे मृतदेह बाहेर काढण्यात आले. मृतांपैकी बहुतेक जण स्थानिक केबेमेर परिसरातील रहिवासी होते. बचाव पथकांना आतापर्यंत फक्त एका व्यक्तीला जिवंत वाचवण्यात यश आले आहे.
शोधमोहीम सुरू, मृतांचा आकडा वाढण्याची शक्यता
शोधमोहीम अजूनही सुरू असल्याने मृतांचा आकडा वाढण्याची शक्यता आहे. पण या बोटीमधून किती जण प्रवास करत होते, हे अद्याप स्पष्ट झालेले नाही. त्यामुळे बेपत्ता लोकांची नेमकी संख्या सांगणं कठीण आहे.
जगातील सर्वात धोकादायक मार्गांपैकी एक
पश्चिम आफ्रिकेपासून स्पेनच्या कॅनरी बेटांपर्यंतचा हा अटलांटिक मार्ग जगातील सर्वात धोकादायक मार्गांपैकी एक मानला जातो. दरवर्षी हजारो जण आपल्या चांगल्या भविष्याच्या शोधात या जीवघेण्या प्रवासात आपला जीव धोक्यात घालतात. ‘वॉकिंग बॉर्डर्स’ या स्थलांतरितांच्या हक्कांसाठी काम करणाऱ्या संघटनेनुसार, या वर्षाच्या पहिल्या ५ महिन्यांतच या मार्गावर किमान ६३५ जणांनी आपला जीव गमावला आहे.
स्रोत: मूळ बातमी
Leave a Reply