नाशिकमध्ये फटाक्यांमुळे चार तासांत २५ ठिकाणी आग

लक्ष्मीपूजनाची पूजा संपताच नाशिक शहरात फटाक्यांची आतषबाजी सुरू झाली आणि त्याच रात्री शहराच्या विविध भागांत आगीच्या घटना घडू लागल्या. रविवारी रात्री सात ते दहा या अवघ्या चार तासांत तब्बल २५ ठिकाणी लहान-मोठ्या आगी लागल्या. सुदैवाने एकाही घटनेत कोणतीही जीवितहानी झाली नाही, मात्र एकाच वेळी शहरभरात घटना घडल्याने अग्निशमन विभागाच्या अधिकारी आणि कर्मचाऱ्यांची मोठी धावपळ उडाली. अग्निशमन विभागाचा भ्रमणध्वनी या काळात सतत खणखणत होता.

मदिना चौकातील आगीवर तासभर मेहनत

सारडा सर्कलजवळील मदिना चौक परिसरात मोकळ्या जागेवर पडलेले भंगार साहित्य, वाहनांचे सीट कव्हर, कुशन आणि मैदानावरील कचरा व झाडेझुडपे यांना रात्री पावणेदहाच्या सुमारास भीषण आग लागली. आगीचे उंच लोट आणि धूर यामुळे संपूर्ण परिसर अंधारल्यासारखा झाला आणि परिसरातील नागरिकांमध्ये भीतीचे वातावरण निर्माण झाले. माहिती मिळताच अग्निशमन मुख्यालयाचे पथक घटनास्थळी दाखल झाले आणि पाण्याचा मारा करून आग आटोक्यात आणण्याचा प्रयत्न सुरू केला. आगीची तीव्रता अधिक असल्याने सुमारे एक तासाच्या अथक प्रयत्नांनंतर आग विझवण्यात यश आले. मात्र भंगार साहित्य मोठ्या प्रमाणावर असल्याने त्याखाली विस्तव शिल्लक राहण्याची आणि आग पुन्हा भडकण्याची शक्यता लक्षात घेऊन अग्निशमन विभागाचे पथक घटनास्थळी तळ ठोकून होते.

शहरभरात लहान-मोठ्या आगी

राजीवनगर येथील मोकळ्या मैदानावरही मोठी आग लागली होती. स्थानिक नागरिक आणि सिडको अग्निशमन विभागाच्या कर्मचाऱ्यांनी ती आटोक्यात आणली. मेन रोडवरील मुख्य बाजारपेठेत एका दुकानाच्या वरील बाजूस वाढलेल्या झाडाझुडपांमध्येही आग लागल्याची घटना घडली. शहराच्या सर्वच भागांत कमी-अधिक प्रमाणात आगीच्या घटना घडल्या, मात्र सुदैवाने कुठेही जीवितहानी झाली नाही. दरवर्षी फटाक्यांच्या आतषबाजीमुळे आग लागण्याच्या घटना घडत असतात. ही दक्षता लक्षात घेऊन अग्निशमन विभाग सज्ज होता, तरीही एकाच वेळी अनेक ठिकाणी आग लागल्याने विभागाची चांगलीच धावपळ झाली.

स्रोत: मूळ बातमी